Editoryal: Welga sa transportasyon
Dunay negatibong epekto ang hulga nga welga o plano nga halapad nga protesta sa Cebu-based transport organization tungod sa halos matag semana nga umento sa mga produkto sa petrolyo sulod sa dul-an sa tulo na ka buwan.
Niadtong Martes, Sepiyembre 19, 2023, ang mga dakong kompaniya sa nasod nipatuman na usab sa ika-11 nga hugna sa umentro sa presyo lana. Naandan sa industriya nga adlaw nga Martes mopatuman sa kausaban sa presyo sa lana.
Ang Pagkakaisa ng mga Samahan ng Tsuper at Operator Nationwide (Piston) Cebu, nagpresentar sa dakong bahin sa transportasyon sa Metro Cebu mipiyait na. Nipadayag sa ilang dakong kabalaka sa kanunay nga pagsaka sa presyo sa lana.
Unang nipadayag ang Piston nga wala moduso og umento sa pletihan tungod sa ilang pagsabot sa kahimtang sa mga kabos nga sumasakay samtang, nisaway sa paghatag sa kagamhanan og ayuda nga salapi sa mga drayber ug operators nga ‘dili saktong solusyon.’
Ang malahutayon nga solusyon sa pagbasura sa Oil Deregulation Law ug ibalik sa kanhi regulated nga polisiya ug ang temporaryong pagsuspenso o pagkunhod sa sa lana.
Si Gregory Perez, chairperson sa Piston Cebu, niingon kon ang kagamhanan nga dili gihapon mamati sa ilang panawagan sa pagsanta sa kanunay nga pagsaka sa presyo sa lana, mapugos sila sa pagpahigayon og welga.
Si Perez wala mohatag og detalye bahin sa plano nga welga gawas sa pag-ingon nga posible nga sunod buwan kini mahitabo dungan sa ubang grupo sa transportasyon sa tibuok nasod.
Matawag kini nga lakang sa sektor sa transportasyon nga pressure sa kagamhanan aron mamati ug mohimo og kongkreto ug dinaliang aksiyon. Ning puntoha, dili tiaw, masabtan nato ang gibati nga kalisdanan sa mga drayber ug operators.
Dugang pa, dili lang transportasyon ang apektado, duna kini ‘domino effect’ sa pagmahal sa mga nag-unang palaliton ug serbisyo. Nganong way tino nga lang ang kagamhanan? Naulipon ba sila sa dagko ug langyaw nga kompaniya sa lana?
Ugma Martes, Septiyembre 26, 2023, may umento na sab kaha? Kon duna pa, makiangayon lang ang plano sa Piston ug ubang grupo sa transportasyon.