Grabe na kaayo ang paghuwat sa mga Sugboanon sa mass transportation nga kuno maoy sulbad sa grabeng trapiko nga nasinati sa Metro Cebu. Tungod kay normal na ang trapiko, di na lang gud mangreklamo ang mga Sugboanon. Gidawat na lang kini nga maoy naandan o normal. Di na normal kon way huot nga traffic.
Usa sa pagpaluag sa dagan sa trapiko mao ang pagpakatap sa mass transportation. Sa sayo nga bahin sa administrasyong Aquino,gihisgutan na ang Bus Rapid Transit (BRT) nga ipatuman sa Dakbayan sa Sugbo. Seryuso na kaayo to kay duna na guy gikuha nga consultant, usa ka langyaw nga kompaniya.
Sagunson pud ang mga konsultasyon nga gipahigayon sa nagkadaiyang mga sektor.
Nahuman na lang ang termino ni anhing Presidente Benigno “Noynoy” Aquino, bisan tipik lang sa karsada alang sa BRT wa gyuy nakit-an. Kutob ra sa drawing ang tanan. Target kuno mahuman sa 2018, apan hapit na lang mapupos ang 2021, bisan usa ka haligi wa gihapon.
Nabanhaw ang hisgutanan sa BRT sa pag-asumer ni Presidente Rodrigo Duterte. Duna na guy pundo nga giutang alang niini, apan kutob ra gihapon sa laway karon ang proyekto. Sunod tuig mahuman na ang termino ni Duterte, hayan drawing ra gihapon sa artist kutob ang BRT.
Gisukip sa administrasyong Duterte ang monorail transit alang sa Metro Cebu. Daghan na sang meetings kalabot ini. Duna nay mga lugar nga gihawanan kay mao kunoy lagbasan sa tren nga gamiton ini. Di sab ni lisod unta kaayo alang sa espasyo kay elevated man.
Apan nahilom na man sab ang kani nga proyekto. Ang saba kaayo karon mao ang parte sa eleksyon sa 2022. Maora gud og nipuli sa topic sa Covid-19 ang eleksyon. Kinsay modagan, kinsay moatbang. Modagan ba sa pagka presidente si Davao City Mayor Sara Duterte o mag bise presidente ba si Presidente Rodrigo Duterte.
Natabunan o nakalimtan ang mga saad nga proyektong imprastraktura sa pagpaluag sa kinabuhi sa mga Sugboanong motorista nga midawat na lang nga normal na ang kahuot sa karsada bisan sa panahon ning pandemic.
Maluagan na ang trapiko sa duha ka mga taytayan sa Mactan kon mahuman na ang ikatulong bridge ug paagian na og mga sakyanan sayo sunod tuig. Kon moadto og Lapu-Lapu ang taga southern Cebu, adto na sila sa Cordova moagi. Makuhaan na sab ang mga sakyanan nga gikan sa habagatan nga moagi sa Cebu City. Di na maghuot ang mga karsada sa Pier area.
Mosamot pa ni kaluag kon matukod ug mahuman ang fourth bridge nga manukad sa Liloan. Dako na kaayo og kahigayunan nga matukod ang fourth bridge kay naa na may pundo alang niini gikan sa Japan.
Apan ang monorail ug BRT, hayan sa drawing ra ni kutob. Hinaut pang di kini kalimtan. O di ba, di na kini mahinayon mao nga magtukod na lang ang DPWH og mga flyover isip alternatibo bisan kon nasuwayan na nga kini di epektibo.