MITULO ang luha Lt. Coronel Juvie Espenido sa kalit nga pagrelibo kaniya sa katungdanan kay naapil sa 357 ka mga pulis anaa sa drug watchlist.
Samtang abot sa dunggan ang pagbuka sa baba sa pagkatawa sa mga naligsan ni Espenido sa kampanya batok sa problema sa ilegal nga drugas.
Grabiha sa maong pasangil kay si Espenido sinaligan ni Presidente Rodrigo Duterte, sa pag-ihaw sa mga pulitiko ug pulis nga nalambigit sa shabu.
Si Espenido maoy nagtumba ni Mayor Espinoza, Mayor Parojinog ug uban pa nga gidudahan nga mga protektor ug nagnegusyo og drugas.
Gipanalipdan ra ba ni Duterte si Espenido. Ug niingon nga kinahanglan nga ipaagi og due process ang kalambigitan niini sa kontrobersiya.
Si Espenido nasuko ni Philippine National Police Chief Gamboa sa pag-apil sa iyang pangan basi sa impormasyon sa PNP Intelligence.
Sa ato pa, wa gyud mahinlo ang hugaw ug bulingon nga dagway sa PNP kon atong basihan ang pagkisikisi karon ni Espenido ug misaway sa ilang hepe.
Board Member, Mayor
Nakahigayon ko og interview sa duha ka Provincial Board member sa probinsya sa Sugbo, nila ni Kerrie Shimura ug Tata Salvador.
Kini nahimo human gikoberan nako ang sesyon sa miaging Lunes nga ang nagtimon mao si Bise Gobernador Hilario Davide III.
Si Shimura nga nagrepresentar sa ikaupat nga distrito.
Samtang si Salvador sa 2nd District, pabor sa pag-quarantine sa mga pasahero gikan sa China ug Taiwan.
Matod nila ni Salvador ug Shimura, katuyoan niini nga dili makasud ug makatakod ang Covid-19 dinhi sa Sugbo.
Pabor sab sila sa desisyon ni Gobernador Gwendolyn Garcia sa pagbutang sa mga pasyente sa facility sa lungsod sa Pinamungahan.
Una nang gidawat ni Pinamungahan Mayor Glenn Baricuatro sa akong interview ang desisyon ni Garcia.
Nahinabi sab nako si Board Member Glenn Soco nga makatabang sa pagsulbad sa trapiko ug mahinong responsabli ang mga drayber sa ordinansa. (efrenlonzon71@gmail.com, text 09235562777)