MAAYO kay daling nakadepensa ang Department of Health ( DOH) 7 nga di tinuod ang mikatap nga balita nga dunay tulo ka positibo sa coronavirus (Covid-19) sa Barangay Basak sa siyudad sa Sugbo.
Sa ato pa, way bisan usa nga positibo sa Covid-19 bisan pa man og dunay Patients Under Investigation (PUI) ug Patients Under Monitoring (PUM).
Nindot ni nga balita sa DOH kay way bisan usa nga nahimong positibo. Sama sa probinsya sa Sugbo, wa say positibo sa coronavirus.
Katong namatay sud sa ospital sa siyudad sa Sugbo, giingon nga positibo sa Covid-19 ang hinungdan sa kamatayon mao ang TB-meningitis.
Libog gani ko og gamay nga positibo man kaha apan dili maoy namatyan ang coronavirus giapil na lang unta sa DOH sa ilang record nga dunay positive sa Cebu City.
Kumusta naman kadtong iyang pamilya nga maoy nag-atiman? Wa bay simtomas ug asa naman sila karon?
Grabe sa Luzon
Grabe ang kahimtang sa katawhan sa Luzon sa pagkakaron sa gipatuman nga enhance community quarantine.
Di na mahimong makagawas sa ilang panimalay ang katawhan. Apan mahimo ang usa ra ka tawo ang makagawas kon dunay paliton nga tambal ug pagkaon.
Pero moabot unya sa ponto nga wala na gyud. Kay ang gobyerno man ang mohatag og rasyon sa katawhan.
Manghinaot lang ta nga epektibo ang maong pamaagi sa pagtubag sa panginahanglan sa katawhan.
Para nako maayo ang katuyoan aron ang kagaw di mokatap. Grabe man gud ang pagsaka sa kaso sa Covid-19 sa Luzon. Ang epekto ra ba aning pag-quarantine sa katawhan maka-develop og laing sakit sama sa depression. Na-depressed na gani ang katawhan sa Covid-19. Kaluoy!
Basura sa Consolacion
Grabihang pabaga sa kadagkoan sa lungsod sa Consolacion. Way tubag sa reklamo sa basura! Kapitan Jagger Pitogo, aksyuni palihog ang paghugawhugaw sa Young Builders sa pagyabo sa ilang basura sa sapa sa Pitogo. Mireklamo nako ang mga molupyo. (Email: efrenlonzon_71@gmail.com / Text: 09235562777)