AYAW kamo og palingla anang nagpahimulos karon sa higayon kay dako kanang bakak nga ang ilang gibaligya nga food supplement makaayo sa sakit sa coronavirus.
Kay sa tinood lang wapay nakaplagan nga tambal alang sa pagpatay sa maong kagaw nga mipatay na ug kapin sa usa ka libo ka mga tawo.
Hinanggaw ug klaro nang panguwarta sa tig-gama og food supplement nga nangangkon nga makaayo sa tanang sakit.
Gani ang mga scientist sa mga abanting teknolohiya sa nasud naglabad pa ang ulo sa pag-experemento sa tambal sa Coronavirus.
Nagka grabi paman gani ang pagpanghasi karon sa Coronavirus nga nagtakod takod sa mga tawo halos sa tanang nasud sa kalibotan. Bag-ong record ang natala karon sa China, sud sa usa ka adlaw kapin sa usa ka gatos ang nangamatay.
DOH, face mask
Karon akong nabantayan dinhi sa siyudad sa Sugbo, migamay ang gidaghanon sa migamit ug mask. Maayo tingali ug ipatin-aw ni sa Department of Health (DOH) nganong menos ang migamit.
Gumikan ba sa pagnihit sa supply sa mask o hasol na alang kanila ang pagsuot para protection batok sa kagaw?
Kay karon migrabi ang pagkuyanap sa coronavirus. Ato sab palig-unon ang paghatag ug proteksyon sa atong lawas.
Travel ban sa Taiwan
Karon duna nay travel ban gikan sa nasud sa Taiwan. Sa ato way biyahi nga tugtan nga biyahi sa mga eruplano nga mogikan ug pasud sa maong nasud.
Posebling sundan sab kini sa ubang mga nasud. Kini human misaka matag adlaw ang gidaghanon sa namatay.
ABS-CBN, Duterte
Bisan unsaon pagpanalipod sa mga tippaghot sa Malakanyang nga way personalan ang gihimo sa gobyerno sa Pilipinas batok sa ABS-CBN.
Gisulti naman daan ni Presidente Rodrigo Duterte, kaniadto pa ang iyang kasuko sa ABS-CBN tungod sa wala pag-play sa propaganda sa pulitika sa election sa 2016.
Sa yano nga pagkasulti kaklaro anang gigukod nila ang higanting network. Kon dunay violation nganong diman pasakaan og kaso ug nganong ang franchise man ang initan? (efrenlonzon@gmail.com / 09235562777)