Kadtong bag-o pa ko nga mobayad og buhis, gipatawag ko sa Bureau of Internal Revenue (BIR) kay sayop kuno ang akong tax returns.
Bisan pag naglisod ko niadtong higayona, naninguha gyud ko nga mabayran ang akong mga kulang nabayran sa buhis. Di lagi ko gusto nga mahimong tax evader. Gusto ko nga mahimong usa ka maayo nga lungsoranon.
Apan, yuna pa. Kon atong tuohan kining desisyon sa Commission on Elections (Comelec) kabahin sa wala pagbayad ni Ferdinand Marcos Jr. og buhis sulod sa upat ka tuig kaniadtong bise gobernador siya dayon nahimong gobernador sa Ilocos Norte sa panahon sa diktadura.
Kining maong desisyon gisulat sa maayong-laki (babaye) nga Comelec Commissioner Aimee Ferolino ug giuyonan sab ni Commissioner Marlon Casquejo.
Naa na diay precedent nga pwede rang di mobayad og buhis? Kana kon tuohan ug suportahan nato kining hinanggaw nga desisyon sa Comelec nga gisulat sa bagag nawong nga si Aimee Ferolino.
Tungod niining desisyon ni Commissioner Ferolino, naay mga sugyot karon nga mag-boykot na lang gyud sa pagbayad sa buhis. Si Marcos ra diay ang makabenepisyo sa iyang bulawanong lohika?
Alang kanako, kuyaw kaayo kining desisyon ni Commissioner Ferolino alang sa atong nasud. Di gud krimen ang di makabayad og buhis kay way balaod kabahin niini.
BALIK LP
Nangahadlok ang daghang mga politiko nga tawgong Dilawan busa namalhin sila sa PDP-Laban kaniadtong pagtungtong ni Presidente Rodrigo Duterte sa poder. Makabahin pa gyud sa mga mehoras sa bag-ong administrasyon.
Gani, si Bise Gobernador Junjun Davide na lang ang nahabiling opisyal nga sakop sa LP dinhi sa Sugbo.
Apan, naay mga pipila nga di opisyal nga niaktibo balik sa LP karong nikusog ang kampanya ni Bise Presidente Leni Robredo. Nisanong sila sa panawagan nga Balik LP.
Tuod man, si Bise Gobernador Davide mismo ang nihurar kanila kuyog kang Rudy Cañeda nga Assistant Vice President for External Affairs sa Liberal Party.
Atong nasayran nga kasagarang lapik sa bag-ong LP mao ang mga karaang mga aktibista nga sakop sa Leni Tanging Pag-asa.
Dinhi sa Sugbo, akong pangagpas nga mas paspas kini motubo diha sa First District kay lig-on ang mga lider sa grupo.
LENI
Daghan sab diay ang mga kalambuan sulod sa lapad nga kalihokan alang kang Leni dinhi sa Sugbo. Lalim bay, dunay duha ka kongresista sa habagatan nga sakop sa One Cebu apan modapig kang Leni.
Ang usa kanila dunay anak nga aktibo kaayo isip usa ka Leni volunteer sa Argao. Matod pa kuno sa maong kongresista, awayon siya sa iyang mga anak kon di mag-Leni.
Dili sila mokuyog sa ilang partido nga naglibog pa karon kon mosuporta ba kang Marcos uban kang Liloan Mayor Christina Frasco ug Kong. Duke Frasco o kang Manila Mayor nga maoy kandidato ni Kongresista PJ Garcia.
Ila kuno kining gipadayag kang Gob. Gwen Garcia kadtong 2-day convention sa One Cebu.
Kon tinuod man gani, kapait no? Dako kaayo og budget nga gigahin alang sa mga kongresista, mayor, ug konsehal apan di diay sila makasaad nga tibuok Partido maghiusa alang sa usa ka presidential candidate? (DM nako sa @anol_cebu)