Nainteresado ko niining electoral protest nga gisang-at ni Liplip Cerna, napildi nga kandidato alang sa pagka mayor sa Pinamungahan, tungod sa alegasyon nga gigamit ang Vote Counting Machine sa giingong pagpanikas sa miaging piliay sa Mayo 9, 2022.
Si Liplip Cerna nipetisiyon sa Regional Trial Court (RTC) sa Syudad sa Toledo alang sa pag-usab og ihap sa mga balota, ang revision sa mga balota, ug ang pagwagtang sa proclamasyon isip mayor sa nag-una sa pag-ihap nga si Jecjec Baricuatro.
Matod pa niya, nakomplikado pagsamot ang giingong pagtikas tungod sa “automation.”
Dunay basehanan si Cerna sa iyang petisiyon nga mao ang mga reklamo kabahin sa sayop nga pagbasa sa VCM og mga balota ug kining giingong mga rejected ballot.
Interesado ko niini aron makasabot kon unsaon, kon naa may pagpanikas gamit ang VCM, sa pagpahigayon niini diha sa usa ka gamay nga lungsod.
Alang kanako, kon tinuod man nga mahitabo kini sa maong lungsod, posible gyud nga mabuhat sab ang pagpanikas sa mas dako nga dapit sama sa usa ka nasud.
Hinuon, ang nakapaduda gyud kanako mao ang kapaspas sa pag-ihap sa nasyonal nga bisan gani og wala pa mahuman ang mga presinto, naa nay resulta sa central office. Buot ipasabot, naay pre-programmed results.
Magpabilib
Bisan pa man sa mga pagduda kabahin sa electoral mandate, panahon na karon sa bag-ong administrasyon ni Ferdinand Marcos Jr. ug Inday Sara Duterte-Carpio nga magpabilib nga angayan lang silang molingkod isip mga lider sa nasud.
Importante karon nga masulbad ang mga daghang mga suliran sa nasud sulod sa mga dekada.
Dili na karon ang panahon sa pagpangaway pa sa oposisyon kay nidaog na man kaha sila. Panahon na alang sa panaghiusa alang sa kalamboan sa nasud.
Kon sayop man ang mga pasangil batok sa ilang grupo sa panahon sa kampanya, panahon na karon sa pagpakita nga sakto lang nga sila ang naa sa poder.
Tungod niini, nakaingon ko nga sayop ang pagtudlo og usa ka nailhan na nga tigpakatap og fake news diha sa Presidential Communications Operations Office (PCOO).
Ang incoming press secretary nga si Rose Beatrix “Trixie” Cruz-Angeles naghatag lang kanato og signal nga ipadayon diay ang pagpangaway sa administrasyon ug kining pag-usab sa kasaysayan sa nasud.
Tugade
Ang National Confederation of Transport Unions (NCTU) niduyog na sa panawagan sa ubang mga transport ug commuter groups nga ilisan na si Secretary Arthur Tugade gikan sa Department of Transportation (DOTr) aron mas masayon sa bag-ong administrasyon sa pagtarong sa mga problema sa maong sector.
Makita na man nato ang epekto sa liderato ni Tugade diha sa kataas sa linya sa mga terminal ug sa pipila ka kilometro nga lakwon na lang sa mga commuter tungod sa kakulangan sa pampublikong transportasyon.
Gilawgaw sab ni Tugade ang transport modernization program nga igo lang gihimong paagi sa pag-phase out sa mga PUJ. Liboan ang wala makatransisiyon ngadto sa mga transport coop. Niresulta kin isa pagkawala sa ilang panginabuhi.
Kon tuyo man sa bag-ong administrasyon ni Ferdinand Marcos Jr. nga ibalik ang ekonomiya sa paspas nga pagtubo, ang pagpabilin ni Tugade usa ka dakong sayop.