Mongaya: Sugbu-ak na sab?

ABI gyud nako og di na mabanhaw kining ideya nga magtukod og laing lalawigan nga nganlan og Cebu Occidental. Usa man gud kini sa nakapalahutay sa pamilyang Garcia diha sa lalawigan ubos sa bandera nga One Cebu.

Nakahisgot ko sa Sugbu-ak kay nagkakita mi ni Atty. Grizelda Mayo-Anda sa haya sa iyang inahan nga si Ma’am Thelma (Condolence, Gertz and the rest of the family) ug akong nasayran nga daghan sab diay sa taga Palawan ang wa makauyon nga buk-on ang maong lalawigan.

Laing giplanohan nga mahimong lain nga lalawigan mao ang isla sa Mactan. Apan dugay pa kining maong proyekto kay gikinahanglan pa man og dugang mga lungsod ang isla.

Balik sa giduso nga Cebu Occidental, akong pangagpas nga ang kadaugan niini nag-agad sa modaog sa bugno nilang Pablo John Garcia ug John H. Osmena nga naninguhang maangkon ang pagka representante sa ikatulong distrito.

Ug dunay bentaha si PJ kay gawas nga batan-on, buotan, ug matinabangon, duna kiniy mga progresibong panglantaw sa pangagamhanan ug sa katilingban.

Unang Distrito

Atong nabantayan nga daw naa kang Kong. Gwen Garcia ang direksyon sa hangin diha sa unang distrito. Saun, wa man guy klarong kaatbang si Edigul.

Unsa ka tinuod kining plano sa mga Gullas nga tungaon ang unang distrito ngadto sa duha kay mas makatabang kini sa padayong paglambo sa mga lungsod niini?

Matod pa, Ang usa ka distrito maglangkob sa Syudad sa Talisay ug ang Minglanilla nga kanhi sakop sa halapad nga friar lands sa panahon sa mga Katsila.

Basi sa kasaysayan sa Sugbo, nagsumpay ang pusod niining syudad ug silingan nga lungsod. Sa laing bahin, ang lungsod sa San Fernando kanhi sakop sa Syudad sa Naga. Ang plano, matod pa, nga himuong laing distrito ang gikan sa Syudad sa Naga ngadto sa lungsod sa Sibonga.

Ang maong distrito maduna unyay duha ka syudad nga mao ang Naga ug Carcar. Mopadayon pa kini sa paglambo unya tungod sa daghang mga naglawig nga mga proyekto sa Naga.

Ang Talisay-Minglanilla mao unyay teritoryo sa mga Gullas samtang ang kongresista nga mo-represent sa Naga ngadto sa Sibonga mahimong ilugan sa mga lider sa duha ka syudad.

Atong pangagpas nga dunay dakong bentaha niini si Mayor Val Chiong sa Syudad sa Naga tungod sa iyang gipakita nga panglantaw (vision) ug liderato.

Di man lang gud slogan ang iyang VAL 2020 nga iyang giladlad kaniadtong pag-inagurar sa Naga isip usa ka Charter City. Unsa may sunod kaha nga iyang kab-uton inig abot sa tuig 2020 ug maglantaw na siya sa mga katuigan human niini?

Coffee Shop

Gilubong sa miaging Dominggo si Kis Ramos. Sa sayo pa sa semana si John Michael Hermoso. Ang ilang pamilya ug mga higala nangaliya nga makab-ot ang hustisya. (@anol_cebu sa Twitter)