SALUDO ko sa kaisog nga gipakita sa mga tinun-an nga nagtungha sa publikong eskwelahan sa elementarya ug high school sa bukirang Barangay sa Lusaran, dakbayan sa Sugbo.
Nakita sa duha nako ka mata ang ilang pag-ubog sa gibahaan nga Lusaran River sa niaging Martes, ika duhang adlaw sa pagbukas sa klase.
Mao ni ang ilang naandan nga buhaton matag buntag og hapon aron makatambong sa klase, tungod kay ang ilang mga pinuy-anan giliyukan man sa sapa.
Depende sa gilay-on sa ilang balay ang uban motabok og 16 ka higayon una pa moabot sa eskwelahan.
Mao ni sila ang nagpuyo sa mga lungsod sa Asturias ug Balamban apan tua mag-eskwela sa Lusaran.
Gipili nila ang Lusaran kay mas duol kon sa eskwelahan sa ilang barangay sila magtungha.
Sama sa mga tinun-an nga nagpuyo sa Barangay Kabasiangan, Balamban.
Gipili nila nga sa Lusaran moeskwela kay pabor sa ilang pagbaktas bisan kun himoon nila ni ug subra sa oras ang pagpadung sa eskwelahan og laing subra sa oras ang pagpauli.
Kadtong gikan sa Astutias mao sab ang ilang girason.
Kini nga sitwasyon mao ra sab ang gitug-an diri nako sa mga tinun-an nga nagtungha sa Mangabon Elementary School nga nahimutang sa boundary sa Cebu City ug Balamban.
Katunga sa 300 kapin ka tinun-an magbaktas gikan sa maong lungsod.
Ginikanan
Lain nakong gisaludohan mao ang mga ginikanan nga nagsakripisyo paghatod sa ilang mga anak sa eskwelahan.
Tungod kay nagbaha unya gagmay pa sab ang ilang mga anak mao nga buntag ug hapon silang magsakripisyo.
Sama nila ni Junrey Labdero ug Juan Cuizon nga pulos taga Caluangan, Asturias kay naa pa sa grade 3 ug grade 4 ang ilang mga anak gikinahanglan nga ilaha ning sung-ayon unyag labang labang sa sapa.
Asoy ni Junrey, di lalim ang ilang sitwasyon kay kinahanglan pa man sila nga mopauli unya'g human og hatod.
Unya mobalik na pud pagka hapon aron kuhaon.
Maayo unta og naay jeep nga masakyan sama dinhi sa ato sa patag.
Mao nga makaingon ta nga wa gyu'y rason nga ang atong mga tinun-an dinhi sa patag magtinapulan sa ilang pagtuon.
Suwerte kaayo mo kay di na kinahanglan nga magbaktas og subra sa oras aron makakab-ot og kinaadman.
Way sapa nga ubogon ug way katugnaw nga antoson samtang magbaktas taliwala sa mabagang gabon.
Solusyon
Ang DepEd Order No. 43 naghatag og kahigayonan sa mga ginikanan sa paghukom nga di nalang pa-eskwelahon ang ilang mga anak kon masinati ang baha diha sa kasapaan.
Pero unsaon ta man nga daghan ang morisgo kay mahadlok nga nauwahi sa klase ang ilang mga anak kung ma absent.
Karsada ig tulay maoy tukma nga solusyon.
Kay lisod man ni mahitabo diha diha dayon ang nitumaw nga solusyon mao ang pagtukid og kapuy-an sa mga bata usip dangpanan panahon nga maabtan sila og baha.