ATONG gipangayoan og panahom ang usa ka psychologist labot sa estado sa panghunahuna ug pagbati sa mga tinun-an ning panahon nga gipugngan ang atong paglihoklihok tungod sa Covid19.
Kini human nga atong gihatagan og pagtagad sa atong Asoy niadtong Sabado ang pagduaw sa mga magtutudlo sa Bulawan National High School, sakop sa lungsod sa Lapuyan, Zamboanga del Sur sa ilang mga tinun-an karong bag-o.
Atol sa ilang house to house nga pagbisita may dala sab sila nga mga kinilong bugas, de latang pagkaon ug noodles. Matod ni Dr. Anna Kathrina Oaminal-Watin, dalaygon kaayo ang gihimo sa mga magtutudlo. Siya nipuno nga mao man bitaw nga gitawag nga noble profession ang pagka maestro ug maestra kay bisan ning panahon sa Covid-19, apil sa ilang gihunahuna ang kahimtang sa ilang mga tinun-an.
"Ang ilang gibuhat naghatag og paglaum sa mga estudyante nga makabalik pa sa eskwela ug sa samang higayon nakatabang sab ni paghupay sa ilang gibati nga kalaay, kabalaka ug kahingawa taliwala sa sitwasyon karon," pasabot ni Dr. Watin.
Sumala niya lahi ang relasyon sa mga magtutudlo ug estudyante. Gihulagway niya ni nga special ug unique kun talagsaon. "Taas kaayo ang panlantaw sa mga bata sa ilang mga magtutudlo.
Unsay ilang isulti ngadto sa mga bata importante kaayo ni nila ug mao gyud ang ilang tuhoan," pasabot ni Dr. Watin. Ang lain nakong nasayran gikan kang Dr. Watin nga ning panahon sa Covid-19 diin sila natanggong sa ilang mga panimalay mas bug-at ang gibati nga kalaay, kahingawa ug kabalaka labi na kon abusado ang ilang ginikanan.
Wala na magkinahanglan og taas nga pagpasabot kining giingon ni Dr. Watin nga abusadong ginikanan. Kahibalo na siguro mo kinsay iyang gipasabot. Gawas sa mga ginikanan nga kusog kaayong manapat sa ilang mga anak, naa pay daghang mga bata nga nag-antos kong ang ilang emosyon ang imong kumustahon.
Wa tuod kastiguha, apan samad sa kasingkasing nga way pagkaalim ang giantos sa uban. Ug ang daling kasumbongan sila ra gihapon si Sir ug si Ma'am.
•••
Piyesta ron sa lungsod sa Pinamungajan pinaagi sa ilang mahal nga patron nga si Santa Monica. Agi og pahaum tuguti nga hisgutan nako ang pagka instant frontliner sa akong amigo. Instant frontliner.
Mao ni mubo nakong kumento sa iyang Facebook sa nahitabo karon sa akong paisano nga si Insoy Niñal, magsusulat ug vocalist sa banda nga Missing Felimon.
Sa pagsugod sa Enhanced Community Quarantine (ECQ) akong nasayran pinaagi sa iyang Facebook nga iyang yutang natawhan nga mao ang Pinamungajan magpalabay sa panahon kuyog ang iyang pamilya. Sa akong pagtuo palabay ra gyud sa ECQ ang iyang pagpauli.
Apan sa nakalabay nga mga adlaw nagbiyahe naman si Insoy sa kabukiran sa Pinamungajan. Pinaagi sa pagpakig-alayon sa munisipyo ubos sa pagdumala sa ilang kugihan nga mayor Glen Baricuatro, si Insoy nahimong frontliner kauban ang iyang kapikas sa kinabuhi pag-apud apod og bugas, de latang pagkaon ug monggos ngadto sa gatosan ka pamilya.
Hinuon di nako mahibung kon ngano. Naa na gyud na sa iyang dugo ang pagka matinabangon. Salamat sa mga kaliwat ni Insoy ug sa donors sa grasya.