DAGHANG nagbagulbol sa grabing trapik nga nasinati sa nakalabayng mga adlaw.
Sa Mandaue City gipasanginlan ang alarma sa patay sa may Tabok area.
Sa Cebu City ang naandan nga problema mas nisamot.
Samtang nagkaduol na ang Pasko pasidaan sa mga motorista ug sumasakay mas mosamot pa ang sitwasyon.
Bisan ang sayo nga Christmas vacation sa mga tinun-an sa mga publikong eskwelahan nga gi-anunsiyo sa Department of Education (DepEd) di ni paigo nga makasanta sa nagka grabe nga problema sa trapiko dinhi sa ato.
Bisan ang mga sugyot nga patas-an ang oras sa mga mall, wa ni epikto sa tinguha nga makasulbad sa problema.
Busa paabota ang tagpila ka oras nga pagka tanggong diha sa karsada.
Ang inyong reklamo nga tagsa ngadto sa tulo ka oras nga biyahe sa mga distinasyon nga biyahion ra unta og tag 15 minutos kong way trapik, basin og mosubra pa.
Ang mga eksperto niingon nga ang trapik maisip nga engineering nga gimbuhaton tungod kay pulos numero ang gihatagan og gibug-aton sa pag-atiman niini 24 oras.
Ang sukod sa karsada, volume sa mga sakyanan, gidaghanon sa mga pasahero, gilay-on sa ruta, minutos nga gitagal kanus-a ang go ug stop sa mga intersection ug uban pa pulos numero ang gihisgutan.
Sa ato pa mosandig sab ta sa engineering kong mangita ta og solusyon sa problema.
Tingale mao ni dagan sa mga diskusyon nga gihimo sa mga tawo nga gitahasan sa paghimo og pagtoon aron sa implimintasyon ang mga magbubuhis nga nagsuweldo nila makatagamtam ug kahamugaway sa inadlaw nga biyahe.
Apil na gani ang imong pag-ihap og oras sa imong pagkatanggong karsada.
• • •
Nisakay ko og dyip padung sa Mabolo sa niaging semana.
Nilingkod ko tapad sa driver. Ang rota Carbon-Mabolo Luyo nga gimaneho ni Jesus Villegas lumad nga sitio 108 Barangay Don Virgilio Gonzales sakop sa lungsod sa Medillin.
Giasoy ni Jesus nako ang iyang mga kasinatian sud sa 48 ka tuig niya nga pagpamasahero.
Matod niya nagsugod siya og pamasahero niadtong 1965 sa pangedaron nga 15 anyos gamit ang Willys nga brand sa dyip.
Tulo pa ka dyip ang magbiyahian gikan sa Carbon padung sa Cabantan.
Dako dako man og sud ang iyang dyip mao nga P12 ang iyang inadlaw nga abang. Ang gagmay og sud P8 ang abang. Ang plite tag 10 sentabos.
Tungod sa kahamugaway bisan kong di aspaltado ang karsada sayon ra kaayo ang 17 ka round trip gikan sa alas 6 sa buntag hangtod sa alas 5 sa hapon. Pag drive hangtod karon maoy gipaeskwela niya sa iyang upat ka anak.
Ang tulo pulos na mga professional. Gikan sa tag 10 sentabos karon tag 7 pisos na ang plite, si Jesus padayong nahigugma ning maong propesyon bisan sa makadaghang higayon nga siya gipaundang sa iyang mga anak. Og karong adlawa magsaulog siya sa iyang ika 70 ka tuig nga sumad sa adlawng natawhan.
Happy Birthday Jesus Villegas. Basin sunod birthday nimo pohon may mga programa na nga moila sa kahago ug sakrapisyo sa atong mga igsoon nga nagpakabuhi diha sa karsada pinaagi sa paghakot sa mga pasahero.