SALAMAT sa mga Paskohanon nga greetings nga nadawat gikan sa mga kaliwat ug kahigalaan. Ikaw may mitimbaya na nimo og malipayong Pasko? O mas labaw pa sa timbaya kay giapilan pa gyud og pinaskohan. Bitaw may madawat man o wala, ang importante nga malipayon ka ug ang imong pamilya. Piskay ang panglawas ug puno sa kadasig. Labaw sa tanan mas nindot magsaulog og Pasko nga limpiyo ang imong tanlag.
Siguro may mga tawo nga malipayon sab nga niduyog sa imong Pasko kay napasaylo nimo sa ilang mga binuhatan nga wala nimo ikalipay sa nangaging mga panahon. Mga bikil o ginagmay nga wala pagsinabtanay imong gikalimtan. Usa ka tam-is nga pahiyom ang imong gidalit uban sa pagtunol sa imong mga kamot isip pagdawat sa usa ka reconciliation.
Mao ni Pasko sa pagpasaylo sa mga tawo nga wala lang siguro tuyoa nga imong gikalalis o gikabikil labot sa mga butang o isyu nga wala lang gyud mo magkasinabot. Hangtod nga niaslom ang inyong relasyon sa dugay na nga panahon. Diha siguroy mga higayon nga gusto na nimong tapuson ang maong kakulian apan nagduhaduha ka basin dili pud dawaton ang imong tinguha nga makig-uli. Hinuon may mga tawo sa imong palibot nga gustong motunol sa ilang mga kamot aron nga kini mahitabo. Naa ra gyud na nimo.
Apan kay Pasko man, asay maayo og hatagan nalang gyud og katumanan. Pasko sa pagpasaylo mas nindot nga mahitabo ni ning panahon sa pandemya. Sa pikas bahin, duna koy gusto ipaabot sa akong mga silingan sa Barangay Kalunasan. Ang akong gipasabot ang atong mga igsuong binilanggo sa duha ka jail facilities. Mga panghinaot nga bisan sa kalisod ug kapait sa inyong kahimtang unta ning paskoha magmalipayon kamo ug ang inyong pamilya.
Sa pikas, usa ka malipayong pagtimbaya ning panahon sa Pasko sa akong mga kaubanan sa media. Labi na sa mga nawad-an og trabaho human tak-upi ang sibyaanang ABS-CBN. Padayon lang ta sa pag-ampo nga masungasong kining mga hagit nga wala gyud palandunga nga mahitabo.