Wa ko kasabot sa akong gibati hangtod karon human ko tawgi sa akong cellphone sa usa ka higala aron pahibaw-on nga ang social media namuwak sa pahibalo ngà kutob na lanģ sa Agusto 31 ning tuiga ang panerbisýo sa mga kanhi nako kauban sa ABS CBN. Didto ko sa sulod sa usa ka botika
Huwebes, Hulyo 16, sa dihang nadawat nako ang masulob-ong baĺita. Pag-uli nako sa balay gitagsa tagsa nako og subay ang mga post sa Facebook labot sa kapalaran sa akong mga kanhi kauban. Hilabihang sakita sa balita.
Nagpahinumdum ni nako sa tuig 1990. Mao sab ning tuiga nga nanira ang sibyaanan nga akong gialagaran. Sa mga suheto ang akong gipasabot mao ang sibyaanan nga dySB nga nipuli sa nabantug kaayo nga sibyaanan nga dyRE. Kauban ang pipila nako nga mga kaubang anchor ug reporter sa dyMF Bombo Radyo Cebu namalhin mi sa bag-ong giablihan nga sibyaanan nga nahimutang sa Tipolo, Mandaue City niadtong 1988.
Nindot ang dagan sa among pangempleyo diin nag-alagad ko isip News abd Program Director. Subracsa minimum ang suweldo wa pay labot sa mga benepisyo. Apan sa dihang gikuso kuso ang Sugbo sa bagyong Ruping sa pagka sunod tuig, lakip nga gibalian sa tower ang among estasyonan.
Bisan pa man, naningkamot ang taga technical nga gipangulohan ni Boy Baura uban nila ni Edward Tan, Wulfran Sabala ug mga kauban nga makapadayon sa pagsibya.
Wala sab magdugay tungod sa problemang pinansiyal giputlan sa tubig, telepono ug kuryente ang sibyaanan. Mao nga sa 30 KVA nga generator nalang kami nagsalig aron makapadayon sa pagserbisyo.
Tungod kay pipila na ka bulan nga wala na makapanueldo ang opisina, may mga kauban mi nga nidangop sa Department of Labor (Dole) aron mahatag ang ilang gipangayo nga suweldo apan, ang gisaligan namo nga generator birahon aron makwartahan. Ni-sign off ang sibyaanan. Samtang gikarga sa truck ang generator, wa nako kapugngi ang pagpatulo sa akong mga luha. Wala nakoy trabaho. Mag-unsa naman lang gipaeskwela nakong mga manghud.
Human niadto nangita ko og laing trabaho. Sa siging pangita balik lang gihapon sa mikropono.
Akong higala nga boxing promoter nga si Sammy Gello-ani nitabang nako nga makakuha og lisensiya sa Games and Amusement Board isip ring announcer.
Tungod sa grabing pagsikat sa pamoksing niadtong panahona dinhi sa Sugbo, halos matag bulan dunay boxing promotion nga maoy basihan sa madawat nako nga professional fee. Buhibuhi lang gihapon sa panultion pa.
May higayon sab nga kuhaon ko sa laing higalang magsisibya nga si Rene Alquizola isip iyang co-anchor sa live boxing coverage, nasustinihan gyud ang obligasyon nako sa akong mga manghud. Para punopuno sa bayad sa eskwelahan girekomendar nako isip round girl ang usa ka nila.