Nalzaro: I-phase out nalang ang mga PUJs?

DUGAY na nga plano sa kagamhanan ang pag-phase out o pagwagtang aning mga karaang public utility jeepneys (PUJ) nga gi-anggaan nga ‘hari sa kalsada’. Kini nunot sa modernization program sa atong kagamhanan sa mga public utility vehicles (PUV).

Ilisan kini og mga bag-ong buses o mini buses nga aircon sama aning mga Beep units nga nagdagan na karon. Niadto pa untang miaging tuig kini apan wala matigayon. Gumikan sa pagsupak sa mga apektadong drivers nga dili usab mahatagan og alternatibong panginabuhian sa kagamhanan.

Gawas pa, dili maka-afford ang mga operators sa pagpalit og mga bag-ong units. Magtukod pa sila og kooperatiba. Hinungdan nga gi-uswag ang phase out sa 2022 sa mga PUJs labi pa kadtong dili makapasar sa motor vehicles inspection service (Mvis) sa Land Transportation Office (LTO). Sa implementasyon sa enhanced community quarantine (ECQ) o lockdown, wala na tugoti nga makabiyahe ang mga public transport apil na ang mga jeepneys. Bisan sa mga lugar nga gibutang na ubos sa general community quarantine (GCQ) wala gihapon tugoti ang mga jeepneys nga makabiyahe kay dili maka-obserbar sa social distancing.

Maayo kaha nga ilahos o i-deretso na lang kaha kini sila sa pag-phase out? Gi-ingon nga ang sukaranan sa tanang invention mao ang science. Ug ang siyensa mao ang salingsing sa maukiton nga pangisip sa tawo. Kining maong punto mao ang gihimong sukaranan sa panultihon nga necessity is the mother of all inventions.

Sama ning kalit nga mihakop kanatong misteryusong sakit nga Covid-19. Ang tanang pros and cons sa pag-phase out sa karaang mga public utility jeepneys nausab ang kamada tungod sa Covid-19. Kay kini mao ang naghatud kanato sa new normal. Ug usa niining new normal mao ang pag- siguro sa usa ka sakyanang pampubliko nga di lang komportable kon dili makasiguro sa social distancing.

Mga rekisito kini sa new normal nga dili ug dili gyud mahatag sa karaang mga jeepneys. So, maayo na lang nga i-phase out na gyud ni sa dayon kay nasugdan naman. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph