NUNOT niining atong pagpakigbatok aa coronavirus disease (Covid 19), daghan ang nagpakabana labi pa ang private sector, pinaagi sa pagtampo kon unsa ang ilang matampo gumikan sa kakuwang sa resources sa gobiyerno. Ang dagkong mga negosyante mihatag og hinabang ngadto sa kagamhanan aron magamit sa nanginahanglan. Ang ubang hinabang gideretso ngadto sa katawhan pinaagi sa ayuda, labi pa pagkaon, niadtong mga panahon nga gipaubos ang pipila ka lugar sa enhanced community quarantine (ECQ), diin kadaghanan nawad-an og trabaho.
Ang uban mi-donate og mga personal protective equipment (PPE) alang sa frontliners, face masks o ubang kagamitan sa pagprotiher sa mga tawo batok sa pagtakod sa virus. Bisan man gani ang ubang kanasuran mihatag usab nato og hinabang.
Dinhi sa dakbayan, nagtukod ang kagamhanan og quarantine facilities sama diha sa karaan nga Sacred Heart School sa may General Maxilom Avenue, didto sa Block 27 sa North Reclamation Area, gi-renovate ang International Eucharistic Convention Center (IEC) sa Simbahang Katoliko ug ingon man gimugna ang Project Noah sa South Road Properties (SRP). Daghan ang mi-donate gikan sa private sector ning maong mga proyekto.
Sa North Reclamation Area lang, aduna kini gahin nga P100 million gikan sa Cebu City Government. Apan matod pa, P50 million lang ang nagasto sa Dakbayan kay adunay mga donasyon gikan sa dagkong mga kompaniya. Mao usab ang Project Noah, daghan ang miamot. Gikompirmar kini mismo ni kanhi konsehal Jocelyn Pesquera nga maoy nag-volunteer sa pag-supervise sa pagtukod sa maong proyekto.
Apan hangtod karon wala pa makahatag og insaktong husay o proper accounting ang kagamhanan o si kinsa man ang nakadawat sa maong mga donasyon. Si Pesquera nagdumili sa paghatag sa listahan sa mga donors ug pila ang ilang nahatag ug giunsa sa paggamit? Dili ba sila mohatag og insaktong husay aron mahibaw-an sa publiko ang mga donasyon sa ngalan sa ‘transparency’? (bobbygnalzaro@gmail.com)