Nagsugod na og binasolay ang administrasyon ug ang oposisyon sa dakbayan sa Sugbo kabahin sa pagpanghatag og hinabang sa mga naigo sa bagyong Odette sa miaging buwan.
Ang oposisyon, Bando Osmeña Pundok Kauswagan (BOPK) miakusar sa administrasyong Barug Party nga namulitika sa pagpanghatag og hinabang. Kini human miatubang si Mayor Mike Rama sa Konseho aron iplastada ang iyang plano ug pamaagi sa paghatag og hinabang.
Gisupalpal ug gikuwestiyon ni BOPK Konsehal Alvin Dizon si Rama. Si Dizon mipaabot ngadto ni Rama sa iyang nakuhang inpormasyon nga namulitika ang grupo ni Rama kay giuna ang ilang supporters ug dumadapig. Sus, morag karon pa natawo si Dizon, sa pulitika sa ingon niini nga kahimtang? Tanang aksiyon sa mga pulitiko, eleksiyon o wala, gisagulan gyud na og pulitika.
Diay ehemplo sa usa ka tawo nga nailang supporter sa BOPK. Unahon kaha na siya na paghatag og hinabang kon ang taga Barug o administrasyon maoy manghatag? Mahatagan man gani na siya pero kinauwahian na ug lisudlisuron pa gyud. Mao usab kana ang mahitabo kon ang taga BOPK ang manghatag. Mao bitaw na nga gitukod ang Barangay Mayor’s Office (BMO) ni Tomas Osmena niadto og ang Mayor’s Information and Liaison Office (Milo) sa karon nga administrasyon.
Dili lang gani sa paghatag og mga mihuras ug mga ayuda. Bisan sa mga paghatag og serbisyo ug sa mga programa naa ang pulitika. Panahon sa paghatag og financial assistance sa senior citizens ug persons with disabilities (PWD) toa nanghatag pod ang Milo. Sa mga programa sa barangay nakigkompetensiya ang taga Milo sa taga barangay. Bisan sa pagpahigayon og vaccination program.
Kining pamulitika dugay na kaayo kining gipraktis nato. Kay mao na kini ang sistema nga atong gisagop. Kanang gitawag nilag ‘political patronage’. Ang mga pulitiko ug ilan gsupporters ang dugay nang nangabuhi niini. Mao nang sa pulitika depende lang sa makapabor. Busa kon akoy Dizon, di lang ko moreklamo. Maghuwat na lang ko kon makapabor ang among grupo.(bobbygnalzaro@gmail.com)