BISAN pa man sa mga kontrobersiya nga naghamok sa Sinulog 2020 nagmalampuson ang pagpahigayon sa grand parade niadtong Dominggo. Mao kadto ang ika-40 ka tuig nga pagpahigayon sa internationally known nga Sinulog Grand Parade human namugna ug na-introduce niadtong 1980. Way mga dagkong problema ingon man mga kaguliyang nga nitumaw. Hapsay kaayo.
Daghan lang ang nitiyabaw nga mga tumatan-aw apil na ang mga sakop sa media nga nag-cover sa grand stand gumikan sa hugot nga siguridad nga gipatuman sa mga sakop sa Presidential Security Group (PSG) gumikan sa pagtambong ni Presidente Rodrigo Duterte. Bisan sugo sa lawas o paglihok-lihok didto, gidid-an gumikan sa siguridad. Limitado ang linihokan. Mao lagi na ang kasagaran nga mahitabo kon motambong ang Presidente. Ato na lang nga sabton. Unya, naguba ang makada sa presentasyon sa mga contingents gumikan kay gihuwat pa ang Presidente.
Anaa gihapon ang mga pagsaway nga sobra ra ang commercialization sa Sinulog. Mas daghan ug namungingi ang mga dayan-dayan sa mga produkto ug mga misalmot sa street dancing. Dili naman siguro angay tang maglalis niana gumikan kay kon walay commercialization, dili man ingon niini ka mabulokon ang pagpahigayon sa tinuig nga kalihukan. Bisan ang Sinulog Foundation Inc. nga maoy nagpasiugda nagkinahanglan man og pundo alang sa pagpadagan sa maong kalihukan.
Mao bitaw nga diha toy pagsuway sa nga exclusive rights sa TV coverage ug pagpamaligya og mga produkto kay aron makatigom og pundo ang foundation. Pero gidiskasi kini ni Mayor Edgardo Labella sa iyang kapasidad isip chairman sa iyang gitukod nga Sinulog Governing Board.
Wad-a ang commercialization di ba magmingaw o langawon ang Sinulog. Puro lang ta religious aspect, simba o atinder og misa, puwerting mingawa. Naa man gihapon ang religious aspect ba kay ang uban moanhi sa Sugbo ug ang mga balikbayan manguli gumikan sa ilang debosyon sa Balaang Bata. Pero samtang mangaliyupo ta sa Balaang Bata, malingaw-lingaw usab ta pinaagi sa mga kalihukan. (bobbygnalzaro@gmail.com)