Mireklamo ang Philippine Charity Sweeptakes Office (PCSO) gumikan kay nikunhod ang ilang income o kita sa swertres gumikan sa mikatap karon nga illegal small town lottery (STL). Matod pa ni PCSO General Manager Royina Garma, sa iyang pagbisita dinhi sa Sugbo karong bag-o, nga mokabat ngadto sa P10 milyones o P12 milyones ang ilang lugi matag adlaw tungod sa illegal nga operasyon sa STL. Gusto ni Garma nga puhagon kining sindikato nga nagpadagan sa STL o masiao. Mahunong kaha ni nga panahon pa man ni Mampor? Unya ang mga nagpaluyo ani suod daw sa kasamtangang administrasyon.
Nganong mas daghan man ang motaya pa sa STL-masiao kay sa legal nga swertres sa PCSO? Sa swertres god aduna may limit nga P12 unya usa ra ka combination. Samtang sa STL o masiao, puwede man motaya og P1 o P5 ug daghan pang combinations. Unya mas dako pa ang dag-on. Inig daug, dili pa lisud kobrahon kay ihatod sa aser sa balay sa tayador. Sa PCSO swertres, adto pa sa ilang buhatan ug daghan pang pirmahan kay government funds. Unya kuhaan pa og buhis kon mosobra sa P10,000.
BISYO SA SUGAL
Kining bisyo sa sugal way kalainan sa bisyo sa drugas o pag-inom og makahubog. Ang mga sugarol sama usab sa mga durugista nga ma-high sa excitement sa kahinam sa sugal. Taliwala ning tanan, unsa bay papel sa gobiyerno? Pagpahunong o pagpadayon? Pagpadayon sa ngalan nga mosumbalik ra sad sa panudlanan sa gobiyerno ang buhis gikan sa sugal? Miingon ang gobiyerno puslan man nga dili ni mapapas, mas maayo pa nga atong sakyan ug atong buhisan.
Then everybody is happy. Happy ang tayador. Happy ang operators o financiers. Happy ang mananakop kay klaro ni nga way hubas-hubas nga gatasan o tinubdan sa unexplained wealth sa pipila kabuok nga nagdawat og suburno o protection money gikan sa financiers, mga pulis o pulitiko.
Di na lang ta magpa-goryo-goryo. Sayod kita nga kon kuhaan sa bakak ang sulti sa taga gobiyerno, wa nay mabilin. Tinuod ba gyud nga ang sugal alang sa katilingban o para sa pagpaburot sa bulsa sa mga naa sa gahum nga mihimo sa illegal nga sugal nga “baka lechera” o gatasan. (bobbygnalzaro@gmail.com)