Nalipay ang Commission on Higher Education (Ched) nga taas ang demand sa mga nurse nga Pinoy sa abroad. Sukad pa man gyud ni kaniadto tungod sa maayong work ethic kun maayo motrabaho ang mga Pinoy nga nurse.
Nang-abroad ang ubang nurses ug daghan pa ang mosunod tungod kay di lang sa dako og sweldo, daghan sab og mga benepisyo ug makabawi sa dakong gasto sa pagtungha. Yes, di lalim ang gasto sa pagpatungha og nursing. Daghan ang gustong motungha apan di maka afford sa galastuhan.
Unsaon pagbawi sa gasto sa pagtungha? Huna-hunaa ug kwentaha. Ang average nga sweldo sa usa ka nurse dinhi sa Sugbo naa sa P16,000 ngadto sa P20,000 sa pribadong mga tambalanan. Naa hinuoy uban nga ni-upgrade sa ilang sweldo ug mas taas ang naa sa kagamhanan.
Arang-arang na lang ni karon kay niadtong 90s ug sayo sa 2000, minimum lang ang sweldo.
Bisan og unsaon, layo ra ni sa kitaon sa nanrabaho sa abroad hinungdan nga sagad sa tumong sa mga mag nursing mao ang abroad. Naay uban nanrabaho dinhi di tungod lang kay nagkinahanglan sila og sweldo, kon di pang experience tungod kay usa ni mga requirement kon motrabaho sa abroad.
Mao nang daghan ang kuwang sa mga position sa mga nurse sa mga tambalanan sa pribado ug gobyerno. Dinhi ni masinati og maayo niadtong panahon sa Covid-19 pandemic. Naay mga kwarto nga di kasudlan og mga pasyente kay way nurse nga makabantay ug maka monitor sa mga pasyente.
Bisan sa mga tambalanan sa kagamhanan nagkuwang ang mga nurse. Bisan tingali og himoan og lakang sa kagamhanan, di gihapon kini makatapak sa kuwang.
Hangtod nga di mahimong affordable ang pagtungha og nursing ug mahatagan og kahigayunan ang mga kabos apan dunay abilidad unta sa pagkuha sa mao nga kurso, di kini makatapak sa haw-ang sa panginahanglan.
Kini nga problema magkagrabe pa sa umaabot nga katuigan.