KINING gitawag nila og Tom Jones dili ang inilang singer kon dili ang mga pulitiko, casual ug job order (JO) nga mga empliyado sa gobiyerno kang kinsang termino kutob nalang sa Hunyo 30 kon taman nalang sa Hunyo o “tam june(s).” Adunay kapin sa 3,000 ka mga casual ug JO nga mga empliyado ang Cebu City hall nga kuyaw nga matangtang sa trabaho inig lingkud na ni Mayor Edgardo Labella karong Hunyo 30 sa udto. Kadaghanan kanila nakulokar sa trabaho tungod sa pulitika mao nga sila maoy unang ma-apektuhan inig-puli sa bag-ong administrasyon. Mao kini ang kamatuoran. Bisan kon moingon pa ang mga bag-ong opisyal nga ipaubos sa assessment ang mga casual ug JO apan milagro na kaayo kon magpabilin sila sa ilang trabaho kay naa sad bayay daghang mga supporter sa mga nanaug nga mga pulitiko nga nagpaabut usab nga mokulokar og pwesto sa gobiyerno.
Apan ang gibantayan karon sa mga tawo mao kining mga konsehal nga sakop sa Bando Osmeña-Pundok Kauswagan (BOPK). Pila man ka buok kanila ang mobali sa Labella administration? Sa pagka-karon si Konsehal Jerry Guardo (BOPK), nga bisan pildero niadtong miaging eleksiyon apan dakug kahigayunan nga makapadayon paglingkud sa konseho kon mahimo nang final and executory ang Commission on Elecions (Comelec) en banc resolution nga naghukom nga disqualified si Konsehal Alvin Arcilla (BOPK) sa pagka-kandidato, mibali na sa Labella administration. Si Konsehal Joel Garganera (Barug PDP-Laban) naglaum nga makapadayon sa serbisyo kon ang Comelec en banc modesisyon usab nga si Konsehal Sisinio Andales (BOPK) disqualified sa pagdagan niadtong miaging piniliay. Kon mahitabo kini ang karon nga 11 unta ka mga konsehal sa BOPK mahimo nalang siyam samtang ang pito sa Barug PDP-Laban mosaka na ngadto sa siyam usab. Mahimo na nga mubotar ang presiding officer Vice Mayor Mike Rama aron sa pag-break sa tabla. Apan gipa-abut nga aduna pay daghang mga konsehal sa BOPK nga mobalingbing ngadto sa grupo ni Mayor Labella. Ang ilang katarungan nga magpaluyo sila sa mayor alang sa kalambu-an ug kaayuhan sa Cebu City. Balingbing!
•••
Human moingon si Presidente Duterte nga dili siya mo-indosar og mahimong sunod nga speaker of the House of Representatives nausab ang hunahuna niini sa dihang mitambong siya sa salu-salo niadtong Martes didto mismo sa Malacañang nga gipreparar ni incoming Rep. Paolo “Pulong” Duterte. Gitambungan kini sa 130 ka mga kongresista nga sakop sa PDP-Laban, Nationalist People’s Coalition (NPC) ug sa 54 ka mga sakop sa Party-list Coalition (PLC) nga pinangulohan ni Kongresista Mikee Romero sa 1-Pacman. Misaad ang presidente nga iyang ipahibawo ang iyang napili-an sa sunod semana. Mitambong mao si Marinduque Congressman Lord Allan Velasco nga kandidato pagka-speaker. Walay mitambong nga taga-Nacionalista Party (NP) diin nahisakop si Kong. Alan Peter Cayetano ug Lakas – CMD nga maoy partido ni Kongresista Martin Romualdez sa Leyte. Kon motingog na si Presidente Duterte, tapus na ang contest. (manny rabacal1144@gmail.com)