ABLI si Davao City Mayor Sara Duterte Carpio nga molansar pagka-presidente human sa termino sa iyang amahan karong 2022. Kwalipikado kaayo si Inday Sara nga mahimong presidente. Abogada ug nagsilbi siya pagka- mayor sa Davao City sama sa iyang amahan, Wala hinuon ako magpasabot nga ang iyang pagtukod sa Hugpong ng Pagbabago isip usa ka regional political party preparasyon na sa iyang pagdagan pagka-presidente. Daghan hinuon nga nagtuo nga mao na kini ang iyang himuong hagdanan padulong sa Malacañang. Ang regional party nga Hugpong dunay 13 ka mga kandidato pagka-senador nga iyang gikampanyahan libut sa tibuok nasud. Nakig-alyansa usab siya sa ubang mga regional political parties. Sa pagka-karon anaa nay mga dagkung pulitiko nga mi-indosar kaniya sa maong pwesto sama kang Senador Sonny Angara. Lain usab mao si Senador JV Ejercito. Apan wala kita masayud kon sipsip ba lang kini sa duha kay gida man sila sa Hugpong party. Mikomentaryo usab si Senador Ping Lacson nga si Inday Sara maoy usa ka bag-ong misubol nga lider sa nasud nga angayang bantayan. Apan sa samang higayon gisaway niya ang mayor tungod sa pagpangulo niini pagtangtang kang House Speaker Bebot Alvarez. Kining pagka-presidente dili mapanunod lang gikan sa amahan apan kon ang popularidad ni Pres. Duterte magpadayon hangtud sa katapusang adlaw sa iyang pangatungdanan, dako kinig matabang sa kandidatura ni Inday Sara.
Apan tungod sa programa sa iyang amahan nga anti-drugs ug anti-graft and corruption, nga nagustohan sa katawhan, tingalig mangita ang mga botante og kandidato nga sama og adbkasiya. Posibli si Lacson nga gipasanginlang mipatay kaniadto sa mga criminal ug wala usab modawat sa iyang pork barrel nga tag-P200 milyones matag tuig niadtong miaging katuigan. Ang uban nga presidential timbers mao sila si Sen. Grace Poe, Sen. Cynthia Villar, Sen. Manny Pacquiao, Sen. Dick Gordon ug si Bise presidente Leni Robredo. Nagpahipi usab sila si Mar Roxas, kanhi foreign affairs Sec. Alan Peter Cayetano ug uban pa. Mausab hinuon ang kamada kon mahimong Federal/Parliamentary ang sistema sa panggobiyerno sa atong nasud.
•••
Ang Rice Tariffication Act mo-epekto sugod Marso 5. Mao kini ang makapaminus sa presyo sa bugas humay og gikan sa P2 ngadto sa P7 tungod kay libre na ang mga negosyante sa pagpamalit og bugas humay gikan sa gawas sa nasud. Gipaabut nga ang gobiyerno mokita og P7 bilyones ngadto sa P11 bilyones sa import duties sa unang tuig sa maong balaud. Sigun sa balaud anaay Rice Competitiveness Enhancement Fund (RCEF) diin labing minus P10 bilyones matag tuig sud sa unom ka tuig nga ihinabang sa mga mag-uuma alang sa mga makinarya ug ekipos aron mo-umento ang ilang operasyon nga makahatag kanilag dakung ganansiya sa mga produkto sa ilang umahan. Ang sobra sa P10 bilyones gamiton isip hinabang sa mga mag-uuma nga maapetuhan. Apan bisan niini adunay uban kanila ang nagprotesta. Murag naa na say nagsulsol kanila. (mannyrabacal1144@gmail.com)