Rabacal: Rama neutral sa barangay elections

Ang Commission on Elections (Comelec)- Cebu City nipahibawo nga sa Barangay and Sangguniang Kabataan Elections (BSKE) adunay 212 ka mga mikandidato sa pagka-punong barangay kun barangay chairman ug 1,672 ka mga kandidato sa pagka-sakop sa Sangguniang Barangay kun barangay konsehal. Aduna usay 196 ang midagan sa pagka-Sangguniang Kabataan (SK) chairperson ug 724 ang milansar sa pagka-sakop niini sa 80 ka mga barangay sa Cebu City sa piniliay karong Oktubre 30, 2023.

Karon pa lang gipahibawo na ni Cebu City Mayor Michael Rama nga dili siya mo endorso og kandidato sa bisan unsang posisyon. Maayo kini tungod kay dili man partisan kining maong eleksiyon.

Tungod niining baruganan ni Rama, daghang mga tawo ang nagpaabot nga kon sila maoy kandidato sa administrasyon, nga gawas nga ituboy ang ilang kandidatura sa mayor, maka­dawat pa sila og campaign funds gikan sa City Hall. Ambot og mao ba kini ang baruganan sa mayor aron dili siya makagasto alang sa iyang mga kandidato.

Gigamit na kini ni presidential candidate Lito Osmeña kaniadto apan wa kini mosaler. Tungod niini, ang mga kandidato nga walay igong pundo nahasirilsiril og pangita’g sponsor nga politiko ug mga negosyante.

Nahimuot usab niining ma­ong sitwasyon ang taga-oposisyon tungod kay aduna na may dakong kahigayonan nga modaug ang ilang paluyohang mga kandidato. Importante alang sa mga mokandidato sa pagka-mayor, kongresista ug konsehal nga daghan ang ilang mga modaog nga barangay kapitan kay mao man usab kini sila ang mangampanya alang kanila inig-abot sa panahon.

Ang mga kandidato nga wala kasabot niining baruga­nan ni Mayor Rama naglungot­lungot sa pagpakita sa ilang kahiubos inig-abut na sa ilang panahon.

* * *

Init kaayo ang piniliay basta BSKE tungod kay ang magkaatbang mga kaila ra ug gani mga paryente pa ang uban. Dili gayud kalikayan sa mga kandidato nga tubig-tubigan nga mamalit og botos. Dinhi hinuon sa Cebu City dili nila mahaylo ang tanan sa salapi. Hinunoa, ang Class D ug E kun ang kinapobrehan sa mga botante daling matintal sa salapi apan nasayran nga ang Class C, B ug A, bisan kon usahay modawat sila sa ihaylong salapi, apan adto gayud kini sila mobotar sa ilang napiliang kandidato. Hinaot pang ang inyong botohan mao kadtong moserbisyo gyud ug dili kadtong buot lamang makahupot og gahom ug magpadato sa posisyon. (mannyrabacal1144@gmail.com)