Kining State of the Nation Address (SONA) gimbut-an sa 1987 Constitution. Mao kini ang behikulo sa presidente sa nasod aron mapahibawo ang iyang mga nahimo ug mga plano sa umaabut nga tuig sa iyang administrasyon. Himuon kini matag ika-upat nga Lunes sa buwan sa Hulyo sa Plenary Session Hall sa Batasang Pambansa Complex sa Batasan Hills, Quezon City.
Sigun sa gipaabut, ang Sona ni Presidente Ferdinand “Bongbong” Marcos (PBBM) gidayeg sa iyang mga dumadapig sa politika apan gisaway sa iyang mga kaatbang labi na sa mga walhong grupo.
Ang mga local government official hapit tanan mibayaw sa kahitas-an sa mga nangahimo sa Presidente samtang ang mga kontra milampurnas niini. Kataw-anan baya kon imong pamation kay klaro man gud kaayong nag-ulo-ulo lang ang uban kanila aron mamatikdan ni PBBM.
Naa hinuoy ubang independenteng mga analyst nga mihinguto og tarong sa gipamulong sa Presidente. Apan dili usab hinuon kalikayan nga ang kabos nga mga kunsomidor naningil sa saad ni PBBM nga P20 nga kilo sa bugas humay ug ang presyo sa ubang nanag-unang palaliton.
Kon akoy pasultihon, kining Sona maoy usa ka tinuig nga kalihukan diin imong maila ang mga sipsip ingon man ang mga kontrabida.
Suma sa audit report sa Commission on Audit (COA), daghan kaayong kalapasan nga nahimo sa nagkadaiyang local government units (LGUs) nga may kalabutan sa salapi sa lungsod nga wala maayo pagkagasto o nangawala. Adunay drainage project nga mikostar og kapin sa bilyon ka pesos nga murag way klaro kon unsay nahitabo. Duna usay gasto sa pagtukod sa Cebu City Medical Center (CCMC), nga suma sa COA, nanobra na og hapit P200 milyunes nga hangtod karon wala pa mahuman, pagpamalit og T-shirts atol sa hapit tanang kalihukan nga balor og minilyon ka pesos, snacks ug ubang kwestiyonableng gigastuhan nga mokabat gihapon og minilyon. Unya unsa man estoryahon ta lang ni? Wa diay manubag niini?
Kon kinasingkasing man gyud kining kampanya ni Mayor Mike Rama batok kurapsiyon, maayo tingaling ipaubos niya sa lifestyle check ang tanang taga city hall, apil siya, kay nabungol na ko sa mga tabi-tabi sa kaadunahan na niining mga kanhi ug karong empliyado sa Cebu City hall nga mansion na og balay sa kabungturan sa Cebu City.
Gisugo ni PBBM ang Department of Justice (DOJ) ug National Bureau of Investigation (NBI) sa pag-imbestigar sa hoarding ug price fixing sa mga produkto sa agrikultura. Sunod niini ang DOJ nakigtambayayong sa Bureau of Customs (BOC) ug Department of Agriculture aron paghimo og task force against agricultural smuggling.
Dugay na kining gipaabut sa katawhan kay daghan na sila’g nabati nga adunay mga suod sa Malacañang nga maoy nangulo niining cartel nga nagpalusot sa mga sibuyas bombay ug uban pang produkto. Gani kining cartel, sumala sa tinubdan sa Kongreso, migamit sa Philippine VIEVA Group of Companies Inc. (PVGCI).
Hinaot pang transparent ang imbestigasyon aron dili magduda ang katawhan nga dunay coverup nga himuon.
(mannyrabacal1144@gmail.com)