Gipahibawo ni Senador Ronald “Bato” dela Rosa nga mibalik na usab ang mga drug lord ingon man ang mga tigamitan og ilegal nga drugas. Katuhoan kini siya tungod kay usa siya ka kanhi hepe sa Philippine National Police (PNP) ug director general sa Bureau of Corrections (BuCor) sa wala pa siya mapiling senador.
Tungod niining maong sitwasyon, buot niyang ibalik ang tokhang (toktok-hangyo) apan gikabalak-an kini sa pipila ka mga tawo. Angay nga ipahinumdom nato sa tanan nga kining tokhang mao ang pagtoktok sa kabalayan sa gidudahang mga tigbaligya ug tiggamitan sa ilegal nga drugas ug paghangyo kanila nga mobiya na sa maong ilegal nga kalihukan.
Sa dihang gipatuman kini panahon ni Sen. Dela Rosa tungod sa palisiya ni kanhi Presidente Rodrigo Duterte, daghang nalambigit sa drugas ang nagparehistro sa nagkalainlaing barangay aron matabangan sila nga mahunong ang ilang ilegal nga kalihukan. Maayo kaayo ang maong kampanya tungod kay tungod sa ilang kahadlok nailhan sa mga tinugyanan sa balaud ang mga pusher ug adik.
Pila ka buwan sukad sa pagpatuman sa tokhang nga miminus ang mga drug dependent ingon man ang mga tigpayuhot. Ang mga mibalik sa maong bisyo dali nga nadakpan tungod kay nailhan naman sila. Ang mga tigpayuhot nadakpan, usahay mapatay tungod sa buy-bust nga gilusad sa kapulisan. Sa dihang daghan nang nangamatay nangreklamo na ang mga tagtungod sa nangamatay. Apan sumala ni Duterte nga resulta kini sa gubat batok ilegal nga drugas kun war on drugs sa iyang administrasyon. Nahimo kining kontrobersiyal labi na sa dihang ang mga sakop sa partido oposisyon mipasaka og mga kaso batok sa kapulisan. Naapektuhan pag-ayo ang maong kampanya sa dihang aduna nay mga kaso nga gi-file sa mga opposition leader ngadto sa Human Rights Commission sa United Nations batok kang Duterte. Hangtud karon wa pa nahuman ang International Criminal Court (ICC) kang Duterte nga buot nilang paatubangon sa maong korte.
Akong balikon nga ang tokhang way kalabutan niining nangamatay resulta sa buy-busts sa PNP. Mao man gud hinuon kini pulong nga gigamit sa mga Tagalog nga gisagop na lang usab sa tibuok nasud. Kon istriktuhon pagsabut, way kalabutan ang tokhang niining mga kamatayon sa mga durugista busa wa man tingali mosupak kon ibalik kini.
Ang gikahadlokan sa kadaghanan mao ang gubat sa ginadiling drugas nga daghang mangamatay. Apan diili ikalimud nga duna usay uyon niining dugoon nga kampanya labi na ang mga tagtungod sa mga biktima sa mga adik.
Lisud ang pagsakay sa mga public utility jeepneys (PUJs) ug taxi karong panahona. Tungod kini sa kadaghang mga tawo nga mamalit og pinaskuhan ug alang sa Noche Buena. Ang labing naapektuhan niini mao ang senior citizens nga dili na kahatagan og priority bisan sa mga sakyanan nga mo-pickup og mga pasahero sa malls ug department stores kay mag-inilogay na ang mga pasahero. Dili na usab mapatuman sa mga tindahan ang priority lane sa mga senior citizen
tungod sa kadaghang customer. (mannyrabacal1144@gmail.com)