Samtang nakaduha na og ka minyo akong ubang higala, duna sab ko’y grupong mga amiga nga puros mga dalaga kay mahadlok magminyo.
Gisuwayan nako og tupo sa akong mga amigo nga mga langyaw apan nagduha-duha gihapon kay para nila dakong risgo ang pagminyo og foreigner.
Diay akong mga ipaambit nga tinuoray nga kasinatian ug kasayuran apil sharing-sharing sa mga Pinay nga dugay nang nangaminyo ug nanimuyo sa laing nasod para makatabang og himo og ligdong nga disisyon kon ugaling dunay plano nga magminyo og langyaw.
Kasagarang mga langyaw adventurous. Bisag unsa na lang nga mga gimbuhaton ug kalihukan ilang sudlan ug apil-apilan sama sa sky-diving, swimming with the sharks, para-sailing, camping ug uban pa nga wa ma uso sa ato.
In other words, kon di ka anad o ganahan og suroysuroy unya kontento ra ka nga magpuyo sa balay, maglisod ka og adjust sa ingon ining adventurous nga kinabuhi.
Diretso ug prangka sab ning mga langyaw. Di kini magduha-duha og bungat o sulti sa ilang huna-huna ug pagbati maong kon ang imong kinaiya susama sa panit sa sibuyas ka nipis kay daling mahiubos o masakitan, angay kini nimong hinuktukan. Ang pangluod o di pagtingog wa kini sa bokabolaryo sa mga langyaw maong ang di ka agwanta daling magkabulag.
Maihap ra sab ang mga langyaw ang maninguha og sabot sa atong kultura ug tradisyon. Kasagaran ini nila gusto nga ikaw maoy mo adjust kay ikaw may mitabok. Apil sa pag-adjust ang ilang panahon ( tumang kainit o ka bugnaw), ug pagkaon nga wa sa ato.
Kasagarang mga langyaw nagdako nga independente ug nag-inusara busa ipadaplin ang pagkasenyorita. Pagbansaybansay daan sa pagluto, panglimpyo, panlaba ug pagmaniho og sakyanan.
Patas ang pagpanrabaho sa laing nasod, ma babaye o lalaki, unya ang magtiayon magpuli-puli og trabaho labi na kon naay anak kay mahal kaayo ang bayad sa yaya o caregiver.
Angay sab magkat-on sa ilang pinulungan aron dunay pagsinabtanay.
Mas labing maayo kon puparehas og relihiyon ug pagtuo.