Nahimong batasan na natong mga Filipino nga kon naa na tay gipamati sa lawas mao pay pagpamalit og tambal aron atong imnon. Unya og asa tong duol nga adto ta makapalit og tambal, adto ta mopalit. Wa na nato gihuna-huna kon awtorisado ba sila nga mobaligya nato ini.
Si Presidente Rodrigo Duterte sayo ning buwana adunay pahimangno kanato nga di ta mamalit og tambal sa mga illegal nga tindahan, hinuon adto ta mamalit sa mga lehitimo nga tindahan nga awtorisado gikan sa Food and Drugs Administration (FDA). Si Duterte nag-awhag usab nga di mopalit niini sa online kay daghan sab kaayo ang binuang.
Matod sa Presidente nga kon peke nga tambal ang imong napalit sa online, moresulta kini nga mosamot ang imong gihambin nga sakit kay peke man ug mas nakalisod niini kon mosunod na ang kamatayon. Si FDA Deputy General Oscar Gutierrez nipahimangno nga di nata mamalit og tambal sa ilegal nga mga online nga tindahan, sari-sari store ug way lisensiya gikan sa FDA.
Sa atong panukiduki, adunay 45,000 ka mga lisensiyadong tindahan sa FDA sa tibuok nasod, diin gikataho sa ahensiya nga sa 185 ka mga sari-sari store nga ilang giimbestigar, ang 78 niini nakasupak sa Pharmacy Act, unya sa 78, ang siyam niini nasuta nga nagbaligya og mga peke nga tambal. Ang 13 ka mga peke nga tambal nga ilang nasakmit kasagaran niini gitambal sa natakbuyan og Covid.
Ning did-an na ang mga sari-sari store nga mamaligya og tambal, asa naman mamalit kadtong pwerteng layoa sa ilang balay gikan sa awtorisado nga tindahan nga maoy palitan og tambal? Naay mga sari-sari store, bisan lawom na ang gabii, pwede ta makahangyo og palit og tambal aron ikadapat dayon nato niadtong mga naay sakit, apan kon mahitabo nga did-an na sa hingpit, di nata makadali-dali sa pagpalit.
Kay niapil na man sa panawagan ang Department of the Interior and Local Government (DILG) nga di na mamalit sa sari-sari store, ang maayo niini nga ang ahensiya momando sa tanang mga barangay kapitan nga gahinan og budget aron mamalit og mga tambal unya anha kini ibutang sa barangay hall. Kon naay mga nagsakit, ilabi na kadtong mga pwerteng layoa sa mga sari-sari store, makapangayo dayon og tambal sa ilang mga Barangay Health Workers (BHW). (josephelvirtubilan@gmail.com)