Daghan ang nakugang niadtong Huwebes sa buntag kay gipanakop ang mga nagbiseklita nga wa nagsul-ob og helmet. Akong nakit-an sa Facebook post sa Sugbo Bike Lanes Board nga sagad sa mga nadakpan yano kaayo nga mga lumolupyo nga naggamit sa biseklita sa pag-adto sa trabaho ug pag-uli.
Nahibawo kong di maka relate niini ang public officials nga sagad naa sa upper middle ngadto sa upper income nahisakop sa hut-ong sa katilingban. Ang biseklita importante kaayo sa yano nga mga lungsoranon, sama niadtong nagtrabaho sa malls, pabrika, construction companies ug uban pang nagsalig lang sa minimum nga suholan matag adlaw.
Ang pletihan karon sa publikong mga sakyanan di na mausap kay modoble ang gidak-on kon magkalayo.
Sa amoa lang sa Bacayan, gipilo og kaduha kon sa Colon ka manaog. Imagine sa yano nga trabahante nga nagsalig sa minimum nga sweldo? Naa pa kahay mahabilin alang sa ilang pamilya?
Tinuod di kuhaan og buhis apan ang deductions sa SSS, Pag-Ibig ug loans pa nila. Unya dugangan pa sa inadlaw nga pletihan ug kaon, pila na lay mahabilin?
Unya dakpon pa ug pamultahon. Giembargo ang biseklita. Unsa pa may sakyan kon ang nadakpan nag bike-to-work?
IPATUMAN
Klaruhon lang nako nga di ko supak sa pagpatuman sa pagsul-ob og helmet ug pagpasubay sa bike lanes. Apan kon mopatuman man gani ang Siyudad, way pilion kon bike lanes ang hisgutan. Nganong duna may mga dapit nga gitugtang makababag nga temporaryo sa bike lanes?
Naa say mga sakyanan nga nagpataka lang og park, sama diha sa P. del Rosario. Kapila na man ko nakakita diha nga ang uban naa pa sa corner nga dako kaayo og sign nga no stopping ug no parking.
Sa ubang mga karsada naa sab ni, apil na diha sa Fuente Osmena. Sa Osmena Blvd., daghan sa mga PUJ ug Beep nga mang pick up og pasahero sa sud sa bike lanes nga magpugos sa nagbiseklita sa paggawas. Wa tay mahimo niana?
Kadtong nadakpan ug gisakmit ang mga biseklita padung sa trabahoan hinaot pang wa pugsa pagbayad og multa kay nag bike gani kay way hapit ikaplete, gikuha na man ang gisakyan.
Hinaot pa sab nga kining atong public officials mag-amutay, mamalit og bisan yanong helmet aron iapod-apod niadtong nasikop nga wa nag helmet.
Kon sa sunod higayon madakpan og balik kay wa gisul-ob ang helmet, diha na silutan aron motagam.
NAGDUSO
Kaming gikan sa nagkalainlaing bike organizations ang nagduso sa ordinansa ug mga probisyon niining Bike Lanes Ordinance. Apan duna say gipangsukip ang mga pulitiko niini.
Nakasabot ko sa kasuko sa biking community sa gituohan nilang kalit nga pagpatuman sa no helmet, no ride nga probisyon sa ordinansa, apil na ang pagpasubay sa bike lanes.
Kuwang kaayo ang pagpakatap sa mga impormasyon sa pagpatuman kay nagsalig sa Facebook posts ug podcasts. Wa mag round sa outlets sa traditional media nga minilyon ang naminaw, nagbasa ug nagsunod.