Pipila na ka mga tuig nga naghisgot ang Dakbayan sa Sugbo ug Mandaue sa paghawan sa daplin sa kasapaan ug himuon kining dapit nga mahimong biseklitahan ug madaganan.
Karon, ang duha ka mga siyudad nagsugod na sa ilang mga programa sa paghawan pinaagi sa pagpatuman sa three-meter easement. Di ni sayon nga tahas tungod kay daghang mga estruktura ang mangaigo nga naglakip sa mga commercial ug industrial buildings.
Naa pay daghang subdivisions kansang gihimong outlet ang sapa, sama aning nahimutang sa Butuanon River nga naglagbas sa Cebu City ug Mandaue.
Sa pag-atubang ni Mayor Michael Rama sa SunStar editors, iyang gipasalig nga naa siyay political will ug iyang higpit nga ipatuman ang tanang mga balaud ug ordinansa aron makab-ot ang Singapore-like niya nga damgo.
Di lalim ang tahas nila ni Rama ug Mayor Jonas Cortes kay daghang mga patigayon ang mangaigo diha lang sa Butuanon River. Apan panahon na nga sugdan kini nga lakang di lang alang sa pagbuhi sa kasapaan sa siyudad, kon di pagpanalipod usab kini sa kadagatan, labina sa isla sa Mactan.
Ang polusyon sa Mactan Channel, kon pasagdan lang, posibleng moabot sa kadagatan sa pikas side sa isla sa Mactan. Ingon niana ka importante ang paglimpyo sa kasapaan.
MGA EPEKTO
Usa sa labing maayong epekto sa paglimpyo sa kasapaan mao ang pagbuhi niini. Mahimo na unya kining kaligoan kay dunay mga dapit niini nga lawom, haom sa pagkaligo.
Malipay usab ang leisure bikers, sama sa mga pamilya, kay duna na silay masikaran nga dapit nga luwas kay layo sa mga karsada.
Imagine, duna nay mga bench sa daplin, paved ang agianan ug duna nay mga tanom sa kadaplinan. Mao ni ang vision sa duha ka local government units (LGU), apan mas nag-una ang Mandaue City sa pagsugod ini kay duna nay portion sa Butuanon River nga gibutangan na og garden.
Gawas ini, mo-improve usab ang quality of life sa mga Sugboanon tungod kay madasig na man sa pagbisita aron mag jogging ug magbiseklita ang mga tawo. Duna na say mga pamilya nga mag bonding kay maanindot ang talan-awon sa kasapaan tungod sa mga kahoy nga naa daplin niini.
Apan nindot tingali nga kon duna may mamaligya, kana lang mobile ug kontrolahon ang gidaghanon kay basin mao ra say magdala og hugaw sa sapa.
KASAPAAN
Naghisgot man ta og sapa, ang Cebu City dunay daghang mga sapa sa iyang kabukiran. Kon wa ko masayop, dunay lima ka major river systems. Gawas sa Butuanon, naay Guadalupe, Lusaran, Bonbon ug Cambinocot nga all-year round dunay tubig.
Ang akong mga higala nga extreme mountain bikers ang nakatultol aning ubang mga sapa nga miagas padung sa Talisay City ug Balamban. Wa pa ko kaabot aning mga lugara.
Kon ma-develop ni as tourist attractions, maanindot kaayo. Malingaw ko sa uban nakong mga higala nga makahapit gyud sa pagpangaligo.
Ingon niana kaanindot ang biking, makabisita ka sa mga lugar nga nagtuo kang wa mo exist, naa ra diay sa tugkaran. You only have to make a trip pinaagi sa human-powered two-wheeled transport.