Sulod sa nanglabay nga katuigan, daghan nang hilig sa biseklita nga nangandoy og bike lane. Kanang protected bike line nga way sakyanan nga makasulod kay mao nay naghatag og kakuyaw namo.
Niadtong 2014 napasar ang ordinansa sa bike lane sa Dakbayan sa Sugbo. Apan wa ni napatuman atol sa administrasyon ni Mayor Michael Rama.
Daghang salamat sa Covid-19 pandemic, nakita sa Nasudnong Kagamhanan ang kamahinungdanon sa bike lane human nakita niini ang nagkadaghan nga mga tawo nga nagbiseklita.
Niadtong mga panahuna nihit ang public transport ug duna pay higpit nga policy ang kagamhanan sa social distancing.
Daghan sab ang nangahadlok matakdan sa Covid-19. Duna say mga tawo nga nagpalig-on sa immune system aron makabatok sa makahahadlok nga sakit.
Apan ang pagpamutang og bike lanes sa Dept. of Transportation ug Dept. of Public Works and Highways (DPWH) dinali-dali. Pila kaha ka gatos ka milyon ka pesos ang nagasto sa kagamhanan, apan kasagaran nahiuli lang sa wala? Classic example ang bike lanes sa Cebu City ug Mandaue.
GILISODLISOD
Gawas nga kinabag-an sa bike lane wa hingpit nga magamit kay mao say subayan sa mga nag motorsiklo. Second class citizens ra gihapon ang mga nagbiseklita.
Di lang kay kana rang paggamit, duna say tipik sa mga ordinansa nga alang nako, ug hayan sa kinabag-an sa bikers, anti-cycling.
Kon ang Cebu City nagplano sa pagpatuman sa pagparehistro sa mga biseklita ug naa pay kataw-anan nga lisensya, ang Mandaue City momando sab sa bikers sa pagsul-ob og knee ug elbow pads.
Pasul-ubon og pads? Kadaghanan ra ba sa mga nag bike-to-work mga kabos, yano nga mga trabahante.
Naglisod gani na pagpalit og helmet ug blinkers, pasul-ubon pa og pads. Ang compulsory nga wearing of helmet ug pag-instalar og blinkers igo na kaayo na.
Kini nga mga probisyon sa mga ordinansa anti biking kaayo. Kinsa may ganahan mosikad kon ing ana ang polisiya nga ipatuman?
Naa man tuoy bike lanes but half-hearted ang pagpatuman kay kuyaw gihapon ang paggamit tungod sa laing mga sakyanan sa kadalanan nga way kurat manggamit sa bike lanes.
Unaha ang paghimo sa bike lanes nga safe kay sa pagpatuman og mga polisiya nga hinanggaw.
ANUGON
Mao na nga anugon kaayo ang pagpamutang og bike lanes kay wa ma ma-maximize ang katuyoan niini nga mao ang paghimo nga luwas sa pagsikad.
Kon nakatugkad pa lang ang policy makers sa kaanindot sa biking ug epekto niini, sulbad sa suliran sa panglawas, proteksyon sa kalikupan ug kahimtang sa trapiko, maneguro unta sila sa pagpanday og ordinansahon ug balaudnon, nga manalipod sa bikers.
Sa kamahal sa mga palaliton karon ug mahal na kaayo nga presyo sa litro sa fuel, ang biseklita unta maoy maayo kaayo nga solusyon.
Apan gianam-anam na man sa pagpiit ang bikers pinaagi sa pagpatuman sa kataw-anan nga mga probisyon sa mga ordinansa nga napasar sa mga konseho. Kataw-anan apan pait huna-hunaon.