Vallena: Nganong mas ganahan ko sa mountain bike

Vallena: Nganong mas ganahan ko sa mountain bike

Kaingon nako nga mamatay na ang pag-uso sa biseklita, apan hangtod karon nagpabilin kining popular dinhi sa nasod bisan kon wa nagpakabana ang kagamhanan sa paghatag og klarong imprastraktura alang sa mas luwas nga pagsikad.

Makigpatintero ang mga biker sa mga sakyanan sa kadalanan, gikan sa Cebu City padung sa norte ug habagatan.

Nagkakuyaw ra ba ang karsada tungod sa nagkadaghang mga sakyanan nga nanagan sa kadalanan.

Daghan pa ra bang reckless makapadagan sa mga sakyanan.

Bisan sa kabukiran nga sementado na, nanaghan ang mga sakyanan tungod kay ang mga adunahan sa siyudad namalit og yuta sa kabukiran tungod kay gusto silang maka relax sa kalangas karon sa palibot.

Kon sa una mingaw pa ang karsada sa alas 6 sa buntag kon motungas ko, karon angay nang bantayan kay duna nay mga sakyanan nga sayo sab ang mga sakay magpabukid.

Gawas nga wa na kakita og challenge ang dugay nang nagbiseklita tungod kay kongkreto na ang mga karsada, daghan nang mga sakyanan, apil na mga motorsiklo ang magsaoysaoy.

Mas nindot ang mag-trail kay bisan lisod, preskong hangin ang sagad nimong mahanggap.

PAGTUON

Dunay mga pagtuon nga nagsuporta sa teyoriya nga makaayo sa panglawas ang pagsuotsuot sa kakahuyan.

Mao gani nga sa abroad, dunay mga tunghaan nga tuyo nga maghimo og mga kalihukan sa mga dapit nga naa sa kabukiran nga baga og kakahuyan.

Bisan gani sa addiction sa gaming, ang outdoor activities usa sa mga therapy nga gigamit sa mga nasod nga nakasugat ning mao nga matang sa problema.

Bisan ang mga tunghaan nagpasiugda og mga kalihukan diin ang mga bata gi-expose og outdoor activities matag semana aron makahunong sila sa pagduwa sa online games.

Mao ni ang rason kon nganong di nako ibaylo ang mountain bike gikan sa road bike.

Maayo unta kon sama sa abroad, duna silay bike trail nga tag 50-100 ka kilometro. Apan diri sa atoa, diha ra gyud ta sa karsada nga kuyaw ug gubot pa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph