Opisyal miawhag sa publiko magbantay sa mga kawatan

Opisyal miawhag sa publiko magbantay sa mga kawatan
SunStar Local News GPX

Giawhag sa usa ka opisyal sa Barangay Banilad, dakbayan sa Mandaue ang iyang mga konstituente sa pagpalig-on sa ilang seguridad sa panimalay human gikawat ang bisikleta sa usa ka residente sa usa ka compound sa AS Fortuna St. niadtong Marso 2, 2024.

Sa pakighinabi sa media niadtong Martes, Marso 5, si Greg Yap, barangay kapitan sa Banilad ug tag-iya sa compound, niasoy nga ang suspek nisulod sa compound mga ala 1 sa kaadlawon ug nibiya sa maong dapit sakay sa bisikleta usa ka oras ang milabay.

Ang insidente nakuha sa CCTV camera sa compound.

Si Yap niasoy nga base sa CCTV footage, nabantayan nga ang kawatan nga nagsakay sa biseklita nipaingon sa Foodland, sa Banilad, Cebu City.

Matod niya nga ang kawatan nga nakita sa footage daw anaa sa sayong 20 anyos.

Ang gikawat nga mountain bike iya sa usa sa mga tenant sa compound. Bisan pa, dili sigurado si Yap bahin sa modelo niini o bag-o ba kini.

Ang kasagarang presyo sa usa ka entry-level nga mountain bike gikan sa P26,000 ngadto sa P56,000.

Si Yap niingon nga ang biseklita gitagoan sa usa sa mga garahe sa maong lugar ug daling nakuha sa kawatan tungod sa kakuwang sa seguridad.

Matod niya nga sukad wala pa nakasugat og ingon niini nga insidente ang mga residente gawas lang niadtong Marso 2.

Si Yap nisugyot nga posibleng nasaypan ang kawatan nga usa sa mga nag-abang hinungdan nga dali siyang nakasulod sa compound.

“Murag nahog lang sya nga ningsulod lang, wa kaayo masita kay wa ta kahibaw lage’g unsay tuyo kay di man sad nato sitahon kay basin palang kon kuan kay nag rent lang,” matod ni Yap.

Matod ni Yap nga nisuway siya sa pag-verify sa biktima kon kaila ba niya ang naghimo niini, apan wa siya nakaila sa kawatan.

Tungod niini, nakahukom siya nga ipaambit ang insidente sa Facebook page sa Barangay Banilad alang sa kasayuran sa publiko.

Gitambagan ni Yap ang publiko nga magpabiling mabinantayon tungod kay adunay mga insidente sa pagpangawat sa nagkadaiyang dapit sa Sugbo, dili lang sa iyang barangay. / HIC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph