Ang Chief Executive Officer ug founder sa Cebu-based Innocentrix business process outsourcing (BPO) nilimod sa iyang criminal liability mahitungod sa wire fraud nga mga akusasyon batok kaniya.
Giingon nga moabot sa $44 milyunes ang kantidad sa kuwarta ang ilang nakuha pinaagi sa wire transfer. Hinuon, ang iyang mga ahente maoy iyang gibasol tungod sa ilang mga lihok nga walay pagtugot sa kompaniya.
Si Sordilla, pinaagi sa iyang abogado nga si Oliver Baclay Jr., niingon niini atol sa press conference nga gipahigayon sa usa ka hotel sa Dakbayan sa Sugbo niadtong Biyernes, Abril 11, 2025. Kini ang unang higayon nga nitubag ang kampo ni Sordilla sa mga akusasyon sukad siya gisikop.
“Very briefly the case of the accusations is wire fraud. I know one liner in response to that, Mike denies and vehemently denies any adult criminal liability, all the accusation, the pro-stated in the DOJ website and later on carried in various news outlets were the actions of sales agents who acted without authority, acted beyond their authority or access the IT (information technology) infrastructure of Innocentrix without authorization. So, all of those actions were done contrary to the policies of Innocentrix,” matod ni Baclay.
Dugang ni Baclay nga si Sordilla kasamtangang gitanggong karon sa San Diego Metropolitan Correctional Center human nga wala maaprobahi ang iyang piyansa.
Si Sordilla ug ang iyang bise presidente sa operasyon nga si Bryan Navales Tarosa gidakop sa San Diego, California, niadtong Disyembre 9, 2024.
Sila ug ilang kauban nga nakabase sa US nga si Gemma Traya Austin nag-atubang og mga kaso nga conspiracy to commit mail ug wire fraud, ingon man money laundering.
Ang US Department of Justice (DOJ) nipasangil nga ang Innocentrix Philippines nag-operate pinaagi sa PageTurner, Press and Media LLC, nalambigit sa modus sa pagpanglimbong sa kapin sa 800 ka tigulang nga mga awtor pinaagi sa bakak nga pag-angkon uban sa mga ahente sa literatura ug dagkong mga studio, nagsaad og TV adaptation sa ilang mga libro baylo sa kuwarta. (CDF)