Ninghakot og 19 ka gold medals ang Arnis de Caballes sa Ormoc City sa ilang pagdominar sa inter-barangay/club eskrima tournament sa Doce Pares Incorporated nga giulohan og "Bahug Bahug sa Mabolo” niadtong Dominggo, Hulyo 6, 2025, sa Mabolo Elementary School sa Dakbayan sa Sugbo.
Gipangulohan ni Leonardo Lao IV ang bisitang eskrima club pinaagi sa pagharos og daog sa iyang tulo ka events sa sparring competitions nga mao ang Single Stick Boy’s bantamweight 13-14 years old, Double Stick Boy’s bantamweight 13-14 years old ug Padded Stick Boy’s bantamweight 13-14 years old.
Ang ubang triple gold winners sa Arnis de Caballes mao sila si Christian Formentera (Traditional Anyo Men’s Open Weapon, Single Stick men’s middleweight ug Padded Stick men’s middleweight), Serge Miyu De Castro (Traditional Anyo boy’s 18 below, Single Stick boy’s bantamweight 15-17 years old ug Double Stick boy’s bantamweight 15-17 years old) ug Hannah Filliza Manto (Single Stick girl’s featherweight 15-17 years old, Double Stick girl’s lightweight 15-17 years old ug Padded Stick girl’s featherweight 15-17 years old).
Nakatunol og duha ka gold medals alang sa Arnis de Caballes mao si Rhona Pornel sa Single Stick ug Double Stick girl’s super bantamweight 15-17 years old.
Ang nakahatag og tagsa ka gold medal alang sa team mao sila si Graica Jane Bugtay (Traditiona Anyo girls 18 years old below), Reynan Tabucal (Single Stick boy’s 10-12 years old), Ammon John De Castro (Single Stick boy’s lightweight 15-17 years old), Jan Emman Danola (Double Stick boy’s lightweight (15-17 years old) ug Yanny Galapin (Single Stick girls 13-14 years old).
Ang Arnis de Caballes nakakuha sab og unom ka silver ug upat ka bronze medals.
Ang home team Mabolo Arnis All Star nahiluna sa ikaduhang dapit pinaagi sa ilang 14-12-2 gold-silver-bronze haul samtang ikatulo ang Sidlak Loon Arnis Club sa Bohol sa ilang 5-12-4 medal tally.
Ang Doce Pares Inc., nga gipangulohan ni SGM Dong Cuesta, ODL, nipadayag og dakong kalipay sa kalampusan sa torneyo. Gawas sa nangahisgutan, aduna pa’y laing 13 ka teams ang ningsalmot sa torneyo. / ESL