Giklaro sa Lapu-Lapu City District Hospital nga posible nga talagsaong komplikasyon sa pagpanganak ang hinungdan sa panghitabo nga nisangpot sa kamatayon sa 31-anyos nga inahan ug bag-o niining natawo nga anak.
Sa usa ka pormal nga pahayag nga gipagawas niadtong Sabado, Agusto 2, 2025, ang publikong ospital nipamatuod nga gisunod nila ang tanang naandang medikal nga pamaagi.
Nisaad usab sila nga mohatag og hingpit nga kooperasyon sa bisan unsang imbestigasyon nga mahimong ipahigayon.
“Lapu-Lapu City Hospital assures the public that all standard medical protocols and emergency procedures were followed. We remain committed to full transparency and are cooperating with any investigations that may be initiated by the family or appropriate authorities,” pamahayag sa LCDH.
Kini nga kalambuan nahitabo human namatay sila Elsie Patambag ug ang iyang bag-ong natawo nga anak niadtong Huwebes, Hulyo 31, sa alas 1:06 sa hapon.
Nalista sa death certificate ang “amniotic fluid embolism” nga maoy hinungdan sa kamatayon ni Patambag ug sa anak niini.
Ang amniotic fluid embolism usa ka talagsaon nga komplikasyon sa pagpanganak nga maoy hinungdan sa cardiac arrest.
Ang pamilya nangayo og hustisya ug nag-ingon nga adunay medical negligence atol sa emergency delivery sa City District Hospital.
Si Mario Patambag, ang bana, nikwestiyon sa desisyon nga operahan ang iyang asawa sa delivery room, nga matod niya, kulang sa saktong sterilization ug ekipo.
Gibutyag sab ni Mario nga nakadawat ang iyang asawa og dili awtorisado nga injection sa paa nga maoy hinungdan sa iyang kasakit ug kaluya sa wala pa ang operasyon.
Agig tubag, ang publikong ospital niingon nga ang medical staff nagpahigayon lang og “routine skin test” aron masuta ang sensitivity sa antibiotic, apan walay laing tambal nga gihatag sa wala pa gibalhin sa operating room complex ang pasyente.
Nakita usab sa mga personnel nga naglaway og sobra si Elsie sa wala pa siya gibalhin sa operating room table.
Matod sa ospital, duha ka scheduled procedures ang gi-reschedule aron ma-accommodate ang emergency caesarean section.
Ang pasyente giatiman sa iyang private obstetrician, kinsa maoy nagdumala sa tibuok procedure.
Sa sinugdanan, ang pasyente gi-admit una sa Carajay Maternity, usa ka pribadong klinika, ug dayon gi-refer sa emergency room sa City Hospital mga alas 11:00 sa buntag sa Hulyo 31, tungod sa usa ka ‘high-risk face presentation” nga nagkinahanglan og dinalian nga operasyon.
Adunay naunang operasyon hinungdan nga nalangay og gamay ang operasyon ni Elsie ug gipasabot sa personnel ang pamilya sa pasyente.
Wala madugay, ang pasyente nagkalisod na sa pagginhawa, dili stable ang blood pressure, ug ubos ang oxygen level niini.
Ang ospital niingon nga gi-intubate si Elsie ug gihimo ang emergency caesarean section.
Ang bata natawo nga hinay ang pinitik sa kasingkasing ug dili na gyud mabuhi. Ang pasyente gideklarar nga patay na sa alas 1:06 sa hapon. / DPC