SUSAMANG budget sa 2025 ang giplano sa Office of the Vice President (OVP) nga P733 milyunes alang sa tuig 2026.
Kini gipahibalo ni Bise Presidente Sara Duterte sa usa ka press conference sa Davao City niadtong Lunes, Hunyo 16, 2025.
Gipasabot ni Duterte nga wala siya nangayo og mas dako nga budget tungod kay gilauman niya nga dili kini maaprobahan sa kasamtangang administrasyon.
“Dahil inaasahan ko naman na hindi ibibigay ‘yung budget ng Office of the Vice President dahil nga hindi naman kami kaalyado ng administrasyon at nakita na natin ‘yun noong nakaraang taon, syempre nga hindi ka sumusunod, hindi ka kaalyado ay hindi ka mabibigyan ng pondong para sa mga proyekto ng opisina mo,” matod ni Duterte.
Nakahukom ang bise presidente nga ipabilin ang kasamtangang budget aron dili maulawan ang OVP personnel atubangan sa House of Representatives ug Senado.
MGA PROGRAMA NGA IPADAYON UG IHUNONG
Sa 2026, way bag-ong mga programa ang OVP.
Ipadayon nila ang kasamtangang mga proyekto, gawas sa medical ug burial assistance ug ang PANsarap project, usa ka nutritional supplementation program alang sa mga bata sa eskwelahan.
Alang sa fiscal year 2025, ang OVP unang nagplano og P2 bilyunes nga budget.
Apan gipakunhoran kini sa House of Representatives ngadto sa P733 milyunes human si Duterte nibalibad paghatag og mga detalye sa paggasto sa iyang opisina.
Bisan pa sa dako nga pagtibhang sa budget, gipamatud-an ni Duterte ang padayong paglihok sa OVP sa public service.
Gitumbok ni Duterte ang mga musunod nga kalampusan sa OVP:Medical assistance: 127,984 ka indibiduwal ang natabangan, Burial assistance: 25,495 ka pamilya, Libreng transportasyon: Kapin sa usa ka milyon ka pasahero ang nakabenepisyo, "Magnegosyo Ta ‘Day Program": 463 ka indibiduwal ug siyam ka organisasyon ang nakabenepisyo,"Kalusugan Food Trucks": 3,914 ka bag-ong giandam nga pagkaon ang nahatag, "Relief of Individuals and Indigents in Crises and Emergencies Program (RIICE)": 146,000 ka indibiduwal ang natabangan, PANsarap project: 13,000 ka estudyante ang niapil, "PagbaBAGo: A Million Learners and Trees Campaign": Nakapanghatag og 199,686 ka school bags ug nakatanom og 301,355 ka kahoy. Gitumbok ni Duterte nga ang kalampusan niining mga programa nahimo pinaagi sa tabang sa kapin sa 1,000 ka kauban.
Giangkon ni Duterte nga nahimong mas mahagiton ang pagpadagan sa mga programa tungod sa "mga pagsaway ug systemathic nga pagpangatake" batok sa OVP.
Sa pagkakaron, si Duterte nag-atubang og impeachment complaint nga giendurso sa House of Representatives niadtong Pebrero. / TPM / SunStar Philippines