GITANGTANG sa katungdanan ang administrator sa Overseas Workers Welfare Administration (Owwa) nga si Arnell Ignacio tungod sa giingong anomaliya nga P1.4-billion deal sa pagpalit og yuta nga gihimo sa ahensya sa iyang pagdumala.
Sa usa ka media forum, ang Undersecretary sa Department of Migrant Workers (DMW) nga si Patricia Yvonne Caunan, kinsa maoy nipuli kang Ignacio, niingon nga ang kasabutan sa pagpalit og yuta gisusi na karon.
Si DMW Secretary Hans Cacdac sa sayo pa niklaro nga si Ignacio wala mo-resign sa iyang katungdanan apan gitaktak kini “on the count of loss of trust and confidence.”
Matod ni Cacdac nga ang kasabutan sa pagpalit og yuta, nga gihimo sa Owwa ubos sa pagdumala ni Ignacio, wala gitugotan sa Owwa Board of Trustees.
Si Caunan niingon nga iya nang gimanduan ang gikinahanglang audit, angayan nga koordinasyon sa Department of Justice alang sa ilang legal nga opinyon bahin sa maong butang, ingon man sa Commission on Audit.
Matod niya nga ang kasabutan, nga gipirmahan niadtong Septiyembre 2024, alang unta sa pagtukod og half-way house o dormitoryo nga puy-anan alang sa overseas Filipino workers (OFWs) nga nahimutang duol sa Ninoy Aquino International Airport (NAIA) Terminal.
Si Caunan nisulti nga ang pundo nga gigamit sa pagpalit sa yuta kabahin sa pundo sa ahensya ug dili sa Owwa trust fund, nga gikan sa tinigom nga pundo gikan sa mga kontribusyon sa member-OFWs, mga marinero, ug ilang mga amo. / TPM / SunStar Philippines