Mas gihingusgan sa Police Regional Office (PRO) 7 ang ilang operasyon batok sa tanang matang sa kriminalidad ilabi na sa ilegal nga drugas subay sa pagtuman sa kamanduan ni PNP Chief Police General Nicolas Torre III nga isiguro ang seguridad sa tibuok Pilipinas.
Gikan sa Hulyo 1-31, 2025 nakalusad ang PRO 7 og 766 ka anti-illegal drug operation nga niresulta sa pagkasakmit sa 15,836.61 gramos sa gituohang shabu nga dunay balor nga kapin sa P107.6 million ug marijuana nga mokantidad nga P34,564.00.
Atol sa maong operation nakasikop ang kapulisan og 896 ka mga drug personality nga gihulagway sa kapulisan nga saktong pamaagi aron mahatagan og proteksyon ang katawhan sa hulga mugna sa ilegal nga drugas.
Tungod niini gidayeg ni Police Brigadier General Redrico Maranan hepe sa Police Regional Office 7 ang iyang mga personnel nga walay hunong nga nakigbatok sa illegal nga drugas ug ubang krimen.
Bahad ni Maranan niadtong padayon nga nagnegusyo sa ilegal nga drugas nga ila gyud kini nga gukdon.
“Ito ay isang mariing babala: ang patuloy na pagtutulak ng droga at pagsira ng buhay ay hindi palalagpasin. Walang ligtas na lugar para sa mga sangkot sa ilegal na droga dito sa Central Visayas,” matod ni Maranan.
Giawhag usab ni Maranan ang publiko nga motabang sa kapulisan sa pinaagi sa pagtug-an kinsa ang mga personalidad nga nalambigit sa pagpayuhot sa ilegal nga drugas sa ilang lokalidad. / AYB