Nakasakmit ang Police Regional Office 7 og 1,536.9 gramos sa gituohang shabu nga mobalor og P10.4 milyunes sulod sa usa ka semana nga anti-illegal drug operation gikan Abril 27, 2025, ngadto sa Mayo 3, 2025, atol sa 122 ka anti-illegal drug operation sa tibuok Central Visayas.
Sa maong operation nakasikop ang PNP og 144 ka mga drug personality nga gipasakaan na og kaso ngadto sa korte.
Bisan sa ilang subsob nga pagpangandam sa seguridad sa National ug Local Election sa Mayo 12, 2025, nagpadayon ang kapulisan sa rehiyon sa ilang kampanya batok sa mga sindikato sa pagpakatap sa ilegal nga drugas.
Ang moang accomplishment nasubay sa kamanduan sa hepe sa PNP nga si Police General Rommel Marbil pagpakusog sa ilang anti-drug efforts tibuok nasod samtang gipatuman ang hugot nga pagbantay atol ning election period.
Si Police Brigadier General Redrico Maranan ang pangulo sa kapulisan sa Central Visayas nibutyag nga ilang mga personnel walay kaluya aron lang mahatagan og proteksyon ang katawhan gikan sa hulga sa mga badlungon sa katilingban ug sa ilegal nga drugas.
Gipasigarbo sab ni Maranan ang pakigtambayayong sa matag police units ug sa local government lakip na sa komunidad nga maoy hinungdan sa malampuson nga resulta.
“The success of our operations is not ours alone—it is shared with every barangay and citizen who believes in a safer Central Visayas,” matod ni Maranan.
Gisubli sa PRO 7 ang ilang hugot nga pasalig sa holistic approach alang sa kahusay ug kalinaw sa tibuok Central Visayas ug ilang gipasalig sa publiko nga walay criminal activity nga maghatag og hulga sa piniliay sa sunod semana. / AYB