P10M balor sa drugs sa 5 ka adlaw nga Sacleo

P10M balor sa drugs sa 5 ka adlaw nga Sacleo
BUY-BUST: Kapin sa P1 million ang balor sa ilegal nga drugas ang nasakmit sa kapulisan sa Dakbayan sa Tagbilaran, Bohol atol sa buy-bust niadtong Biyernes. / TAMPO SA TAGBILARAN POLICE

Dul-an sa P10 million nga balor sa ilegal nga drugas ang nasakmit sa Police Regional Office 7 sa ilang Simultaneous Anti-Criminality and Law Enforcement Operations (SACLEO) gikan sa Hunyo 25-29, 2024.

Ang labing dako nga nasakmit mao ang 1,200 gramos sa gituohang shabu nga dunay standard drug price (SDP) nga P6,163,248.

Sa samang mga adlaw, nakasikop ang PRO 7 og 590 ka mga suspek sa lainlaing krimen, diin 181 niini nalambigit sa ilegal nga drugas.

Samtang nakasakmit usab ang Tagbilaran City Police Station sa Lalawigan sa Bohol og 215 gramos sa gituohang shabu nga mobalor og P1,462,000 atol sa gilusad nga buy-bust.

Nahitabo kini sa alas 2:31 sa Biyernes sa hapon, Hunyo 28, 2024 sa Purok 3, Manlangit Street, Barangay San Isidro, Dakbayan sa Tagbilaran.

Ang suspek giila nga si alyas Ricky 36, taga Sitio Daorong, Danao, Panglao, tour driver, nga maoy target sa operation, lakip na ang iyang kauban nga si alyas Luniel, 35.

SUGAL

Sa kampanya batok sa illegal gambling, nakasikop ang kapulisan og 217 ka mga sugarol ug nisakmit sa P16,981.25 nga patad.

Moabot usab sa 18 ka mga suspek ang napusasan sa kaso sa illegal possession of firearms ug nakasakmit og 102 ka mga armas nga wala marehistro ug tulo ka eksplosibo.

Wala mohunong ang kapulisan sa Central Visayas sa paggukod sa mga wanted persons nga dunay mga pending warrants of arrest sa lainlaing mga kaso nga giatubang.

Nakasikop sila og 159 ug 15 ang giila nga mga wanted person nga dunay bug-at nga mga kaso.

Matod ni Police Brigadier General Anthony Aberin, hepe sa kapulisan sa Central Visayas, ang pagkasakmit sa gidaghanon sa ilegal nga drugas resulta sa ilang aggressive, higly-analytical ug intelligence-led operation.

Tukmang kaso ang ipasaka sa kapulisan batok sa mga nangadakpan sa ilang walay hunong nga anti-criminality campaign.

Modoble pa kini sigun sa heneral subay sa nagsingabot nga dako’ng kalihukan sa Sugbo nga mao ang Palarong Pambansa 2024. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph