Nakuha gikan sa usa ka 22-anyos nga babaye nga giingong bodegera sa shabu ang 1,500 gramos nga crystalline substance nga gituohang shabu nga adunay standard nga presyo nga P10,200,000 atol sa buy-bust sa City Drug Enforcement Unit (CDEU) sa Talisay City Police Station pinangulohan sa station commander nga si Lieutenant Colonel Epream Paguyod, sa Yongco compound, Brgy. Bulacao, Talisay City, alas 12:48 sa kaadlawon sa Biyernes, Hulyo 19, 2024.
Gihulagway sa kapulisan nga high-value individual ang suspek nga giingong nagtrabaho isip “caretaker” sa “drug warehouse.”
Giila ang live-in partner niini nga si alyas Kulot, residente sa Sitio Hawud sa nahisgutang barangay.
Ang CDEU nihimo sa anti-illegal drug operation human masusi ang impormasyon bahin sa kalihukan sa ilegal nga drugas sa suspek.
Sa pagkasikop kaniya, nakuha usab sa kapulisan ang 14 ka dagkong pakete sa gituohang shabu sa iyang shoulder bag, lakip ang P400 nga kwarta nga gituohang halin sa ilegal nga drugas ug cellphone.
Ang mga nasakmit nga ebidensiya gisumiter sa Cebu Provincial Forensic Unit alang sa chemical analysis. / DVG