Gihangop sa Philippine Drug Enforcement Agency (PDEA) 7 ang pagkasakmit sa kapin sa P110 milyunes nga balor sa illegal nga drugas sa Central Visayas (CV) sud sa tulo ka adlaw nga simultaneous anti-crimina-lity and law enforcement operation (Sacleo).
Samtang, 214 ka drug personalities ang nasikop.
Si Leia Alcantara, ang information officer sa PDEA 7, niingon nga dako kining kalamposan human nasanta ang pag-apud-apod niini.
Matod ni Alcantara, ang CV giila nga transhipment point sa druga ug naa usab dinhi ang dakong merkado sa illegal nga drugas.
Bisan pa man nga nahimong transhipment ang Sugbo, matod ni Alcantara, madakpan ra gihapon sila sumala sa data nga makita matag adlaw.
“Good indication nga active atong law enforcement, pursigido gihapon ta sa atoang campaign. Naa puy harmonious relationship ang law enforcement nato, dili iya-iya ang operation. In fact, naa tay shared data base sa PNP ug sa PDEA. Naa tay gi-conduct regularly nga intelligence workshop,” pasabot ni Alcantara.
Dugang ni Alcantara nga base sa nangagi nila nga operations, duna gyud silay naila nga bag-ong drug personalities nga konektado sa usa ka drug group nga naglihok sa rehiyon.
Apan iyang gipasabot nga dili kini susama sa mga drug group sa nanglabay nga katuigan nga mga dagkong grupo.
Kini nga grupo maoy gipadayon karon sa kapulisan ug PDEA 7 sa pag-monitor nga dili modako diin ang ilang mga gaway maoy gipanghipos sa sunodsunod nga mga pagpangronda nga gihimo.
“Naa tay mga gipang-develop ana, gipang-surveillance nga mga grupo-grupo diri sa region,” dugang ni Alcantara.
Sa data nga gipahibawo ni Alcantara, nasuta nga gikan sa Enero 2024 hangtod sa unang mga semana sa Pebrero, nakalusad na sila og 653 ka anti-illegal drug operations diin 799 ka tawo na ang nadakpan, lakip sa ilang Sacleo.
Sa maong operations, nakasakmit ang ahensya og 30,589.2575 grams sa shabu nga dunay estimated market value nga P208,006,951.