P11.6M nga drugs nasakmit sa polis

MGA SUSPEK: Sila si Egie Abenes Relampagos, 30, mananagat, dunay kapuyo, taga Sityo Rattan sa Tanke ug Randy  Mabala Daan, 34, ulitawo, drayber sa e-bike, nasikop sa buy-bust sa Sityo San Rafael, Barangay Tanke, siyudad sa Talisay, alas 7:59 sa gabii sa Huwebes,  Pebrero 8, 2024. / gikan sa Talisay Police Station
MGA SUSPEK: Sila si Egie Abenes Relampagos, 30, mananagat, dunay kapuyo, taga Sityo Rattan sa Tanke ug Randy Mabala Daan, 34, ulitawo, drayber sa e-bike, nasikop sa buy-bust sa Sityo San Rafael, Barangay Tanke, siyudad sa Talisay, alas 7:59 sa gabii sa Huwebes, Pebrero 8, 2024. / gikan sa Talisay Police Station

Duha ka high-value target ang nasikop sa Mandaue City Police Office (MCPO) sa managlahing mga buy-bust karong semanaha, nga niresulta sa pagkasakmit sa P7.6 milyunes nga kantidad sa gituohang shabu.

Ang unang suspek nga giilang si Mitchell De-erit Abellaneda, alias Mitch, 32, residente sa 245 Mahayahay, A. Lopez St. sa Barangay Calamba, dakbayan sa Sugbo, nakuhaan og mga pakete sa gituohang shabu nga motimbang og kapin o kulang 100 gramos nga gibana-banang dunay standard drug price nga P680,000.

Ang laing suspek nga si Rogelio Alforque Gajudo, alias Roger, 56, molupyo sa Barangay Buhisan, dakbayan sa Sugbo, nakuhaan og mokabat sa 1.025 ka kilo sa gituohang shabu nga gibana-banang mobalor og P6.9 milyunes ang presyo.

Niadtong Pebrero 8, Huwebes sa gabii, mga alas 10:38 sa gabii, nasikop si Abellaneda sulod sa North Reclamation Area sa Barangay Su­bangdaku.

Pagkasunod adlaw, Pebrero 9, mga tungang gabii, nasikop si Gajudo sa ML Quezon Street sa Barangay Maguikay, dakbayan sa Mandaue.

Si Abellaneda giklasipikar nga high-value individual (HVI) alang sa drugas sa lebel sa siyudad, samtang si Gajudo gi-tag nga HVI sa regional level.

TALISAY

Usa ka mananagat ug drayber sa e-bike nasikop ug nasakmitan og kapin sa P4 milyunes nga balor sa gidiling drugas atol sa buy-bust sa Sityo San Rafael, Barangay Tanke, siyudad sa Talisay, alas 7:59 sa gabii sa Huwebes, Pebrero 8, 2024.

Ang nasikop mao sila si Egie Abenes Relampagos, 30, mananagat, dunay kapuyo, taga Sityo Rattan sa Tanke ug Randy Mabala Daan, 34, ulitawo, drayber sa e-bike, taga Sityo Magay sa samang barangay.

Ang buy-bust gilusad sa City Drugs Enforcement Unit Intelligence Police sa Siyudad sa Talisay ubos sa kamandoan sa ilang hepe nga si Police Lt. Col. Wayne Magbanua ug mga sakop sa Philippine Drug Enforcement Agency (PDEA 7).

Ang duha giila sa kapulisan nga high value individual (HVI) ug nasakmitan sa gibana-banang 600 gramos nga shabu nga may standard drug price nga subra sa P4 milyunes.

Lakip sa nasakmit mao ang 9mm pistol nga may magazine ug upat ka mga bala.

Sa dihang na-validate nga positibo sa ilang ilegal nga negosyo, gilusad dayon sa kapulisan ang buy-bust.

Ang duha gipangtanggong ug gikatakda nga pasakaan og kaso nga paglapas sa Republic Act 9165 kun Comprehensive Dangerous Drugs Act of 2002.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph