Giila sa kapulisan nga high value individual (HVI) nga target sa operasyon nakuhaan sa binulto nga shabu nga nitimbang og usa ka kilo ug 800 gramos nga mobalor og P12,240,000 subay sa standard street price.
Ang buy-bust sa Purok 3, Barangay Dao, dakbayan sa Tagbilaran, Bohol, alas 12:35 sa kaadlawon, Dominggo, Disyembre 1, 2024.
Ang suspek nga nasikop giila nga si Teresito Salinas, 44, minyo, way trabaho, ug taga Purok-2, Barangay Ubujan sa Tagbilaran.
Ang operasyon gilangkoban sa hiniusang pwersa sa Bohol Provincial Intelligence Unit, Provincial Drugs Enforcement Unit nga gipangulohan ni P/Lt. Mark Jucel Reburiano ug P/Lt. Noubel Padernal ubos sa kamandoan ni P/Lt. Col. Jomar Pomarejos uban sa Tagbilaran City Police Office pinaagi sa koordinasyon sa Philippine Drug Enforcement Agency (PDEA) 7.
Nasayran nga ang Bohol, labi na sa Tagbilaran, giisip na sa PDEA 7 nga usa ka transshipment point human sa sundsunod nga dinagko nga pagkasikop sa gidiling drugas.
Ang transshipment point nagpasabot nga agianan na sa gidiling drugas nga ipang-apud-apod ngadto sa ubang dapit sa Kabisay-an ug Mindanao tungod sa maayong pasalidad na sa transportasyon ug malambuong ang ekonomiya.
Ang dakbayan sa Sugbo maoy unang naila nga transshipment point dinhi sa Central Visayas. / DVG