Nikabat na sa kapin sa P1.236 bilyunes, ang kadaot sa agrikultura sa nasod tungod sa El Niño phenomenon, sumala sa National Disaster Risk Reduction and Management Council (NDRRMC) sa Miyerkules, Abril 3, 2024.
Sa situational report, ang NDRRMC niingon nga ang kinatibuk-ang pagkawala sa produksiyon tungod sa El Niño, niabot na og kapin sa P1.236 bilyunes ug naglakip kini sa kinatibuk-ang 2,815 ka ektarya sa apektadong crop area nga walay kahigayonan nga maulian.
Kini nga mga kadaot sa agrikultura natala sa Ilocos regions, Cagayan, Calabarzon, Mimaropa, Western Visayas ug Zamboanga Peninsula.
Ang NDRRMC nagkanayon nga adunay kinatibuk-ang 84,731 ka pamilya o 416,820 ka mga tawo sa 378 ka barangay sa Mimaropa, Western Visayas ug Zamboanga Peninsula ang apektado sa kadaot dala sa ting-init.
HINABANG
Matod pa nga adunay kinatibuk-ang kapin sa P487 milyones nga kantidad sa hinabang, nga naglakip sa family food packs, financial aid, fuel, GI sheet, generator ug hygiene kits, ang gihatag sa mga apektadong pamilya, apil na ang mga mag-uuma.
Ang disaster bureau nagkanayon nga adunay kinatibuk-ang 17 ka mga siyudad ug lungsod partikular na sa mga probinsya sa Oriental ug Occidental Mindoro, Romblon, Palawan, Zamboanga del Sur ug Ifugao, ang mideklarar og state of calamity tungod sa El Niño phenomenon.
Sa usa ka press conference, si Department of Agriculture Secretary Francisco Tiu Laurel nipasalig sa paghatag og tabang, ilabina sa planting inputs, nga wala magkinahanglan og daghang tubig sa mga apektadong mag-uuma.
Matod niya, nakig-alayon usab sila sa Department of Labor and Employment (Dole)alang sa paghatag og alternatibong panginabuhian sa mga apektadong mag-uuma ug ilang pamilya.
Si Department of Science and Technology (DOST) Secretary Renato Solidum Jr. sa sayo pa, niingon nga ang nagpatigbabaw nga El Niño phenomenon o dry spell mahimong magpadayon hangtod Agusto 2024. / TPM,SunStar Philippines
samtang adunay 62 porsyento nga tsansa nga masinati ang La Niña phenomenon sugod sa Hunyo.
Ang Philippine Atmospheric, Geophysical and Astronomical Services Administration (Pagasa) nideklarar niadtong Marso 22, 2024 nga opisyal nga pagsugod sa “Philippine Summer” diin init ug uga nga mga adlaw ang masinati sa tibuok nasod. / TPM,SunStar Philippines