Tensyonado sulod sa sobra usa ka oras ang pipila ka sakop sa Sanguniang Panlalawigan (SP) atol sa regular session niini sa Lunes, Mayo 26, 2025.
Ang dakong lalis nitumaw gumikan sa giluwatang pamahayag ni bokal John Ismael Borgonia sa tersero distrito kalabot sa pagduso sa P1.2 bilyunes nga supplemental budget number 1 atol sa special session sa milabay'ng semana, Mayo 21, 2025, nga wala matuki ug wala maaprubahi kay wala ma quorum ang mga sakop sa hunta.
Si Borgonia unang niluwat og pamahayag nga dili siya gusto nga mahimong kabahin sa pagpasar sa maong pundo gumikan kay giingong gihimo kini “in bad faith” ug giingon'g makaapekto sab kini sa pagsulod sa bag-ong administrasyon nga pangulohan ni Governor-elect Pamela Baricuatro.
Ang maong pamahayag butang nga wala mauyoni sa pipila ka sakop sa hunta ilabi na ni Association of Barangay Council (ABC) Presidente Celestino “Tining” Martinez.
Matod ni Martinez, nahimong sumsuman ug “hot topic” sa social media ug mainstream media ang maong hitabo, napun-an pa sa pamahayag ni Borgonia nga gihulagway niining “malisyoso”.
“Mr. Chair, I find it disheartening that at a time when we should be united to ensure a smooth transition for the incoming administration, this court is being questioned and doubts are being cast upon our proceedings — and ultimately, against this institution,” matod ni Martinez sa Mayo 26, 2025.
“The gentleman’s remarks were presumptuous, blatantly unfair, and evidently biased, especially for those who attended in last special session. He did not even participate in the consultative meetings for that purpose, Mr. Chair” dugang niya.
Samtang si bokal Victoria “Tata” Corominas Toribio nagtuo nga ang pamahayag ni Borgonia nakalangkat sa katungod sa mga bokal nga mobarog sa ilang kaugalingon'g opinyon kalabot sa giduso nga lakang.
“This is a show of how low the opinion of the gentleman from the third district has of his colleagues. We are all professionals here, and we are all here to do our job. To say that the budget will pass because [of the] majority; it’s a numbers game... he is taking away our individual stand and opinion on the matter,” sumala ni Corominas.
Si Board Member Glenn Anthony Soco nipadayag sab sa iyang concern ug nihangyo nga tangtangon ang mga pamahayag ni Borgonia sa official records.
“So with that Mr. Chair I would like to put it on record and manifest in strongest terms that those statements made by Board Member Jiembo Borgonia publicly is irresponsible, its reckless, it uninformed, its deliberate, uncalled for and i strongly denounce such statements Mr. Chair. I move that those statements issued by Board Member Borgonia be stricken off from the records,” matod ni Soco.
Ang maong mosyon gisegundahan ni Martinez, na-carry nga way nibabag.
Atol sa maong sesyon, wala maapil sa calendar business ang supplemental budget human gibalik na kini sa Committee in Budget and Appropriations sa Office of the Governor niadtong Mayo 23 sa alas 12:55 sa hapon alang sa dugang pagsusi ug assessment.
Gi-withdraw sab ni Borgonia ang iyang resolusyon pag-awhag sa iyang mga kaubanan nga i-defer ang hisgutanan ug deliberation sa SB1.
“Considering that there is no supplemental budget for approval in today’s agenda, Mr. Chair, this does not serve any purpose. So, considering that, Mr. Chair, there’s no point in discussing this. As the author, it is also my right to withdraw at any time a certain resolution which does not serve any purpose,” matod ni Borgonia.
“The main purpose of this resolution was, of course, to stop the supplemental budget from passing,” dugang niya.
GIKLARO
Apan si Martinez sa iyang bahin nidepensa sab nga ang maong supplemental budget dili lang alang sa padayon nga operasyon sa kasamtangang administrasyon, apan mosuporta sab kini sa bag-ong sakop sa Sangguniang Panlalawigan nga adunay duha ka bag-ong miyembro, gikan sa lone district sa Mandaue nga walay exisiting budget hangtod sa katapusan sa tuig 2025.
Matod ni Martinez, ang Supplemental Budget kon ibalik sa executive, ilang i-review pag-ayo sama sa ilang gihimo sa milabay nga mga lagda nga moagi sa Sangguniang Pana-lalawigan.
Ang mga bokal nisaad hinuon sa publiko nga ang ilang lakang seguro nga mosubay sa ilang tinguha aron mahapsay ug transparent ang paghulip sa umaabot nga administrasyon.
Nahuman ang sesyon sa alas 3:32 sa hapon.
Human sa sesyon atol sa pakighinabi sa mga tigbalita, si Borgonia nagkanayon nga wala siya'y laing intensyon sa iyang kaugalingon'g opinyon hinungdan nga iyang gidugang nga giingon'g walay angay nga ikasuko.
“Igo ra man ko nisulti sa akong opinion, kon nasayop ko dili angay ma-defensive ngano nga wala man sila'y dautang gibuhat? Wala man sila'y dautang plano,” matod ni Borgonia.
Si Borgonia ni-withdraw sa iyang kandidatura atol sa piniliay sa National ug Local sa Mayo 12 gumikan sa giingong wala makadawat og igong suporta gikan sa partido.
Bisan pa niini, giingon'g wala pa siya'y direktang plano human sa iyang termino pagka board member apan giingon'g dunay mga gitanyag nga posisyon alang kaniya. / ANV