Kapin sa P1.2 milyunes nga balor sa ilegal nga drugas ang nasakmit sa Regional Police Drug Enforcement Unit (RPDEU 7) ug Mambaling Police Sation sa managlahi nga anti-illegal drug operations sa Miyerkules sa hapon, Hunyo 26, ug Huwebes sa kaadlawon, Hunyo 27, 2024.
Unang operasyon gilusad sa RPDEU 7 sa dalan Spolarium sa Barangay Sawang Calero, akbayan sa Sugbo nga niresulta sa pagkasikop sa usa ka high value individual (HVI).
Ang nadakpan giila nga si alyas Jomar, 31, taga dalan sa T. Cavan, Barangay Pasil, dakbayan sa Sugbo.
Nasakmit sa mga personnel sa RPDEU 7 ang mga binulto sa gituohang shabu nga motimbang sa 100 gramos nga mobalor og P680,000.
Duha ka semana nga gipaubos sa surveillance ang suspetsado human madawat ang impormasyon nga padayon ang kalambigitan niini sa illegal nga drugas sa dapit.
Sa ilang monitoring maka baligya si Jomar og 500 gramos matag semana sa Metro Cebu.
Giila siya nga tighatod kung maabot na ang supply sa ilegal nga drugas diin ang iyang contact naa sa sulod sa Cebu City Jail.
Samtang, malampuson nga nasikop atol sa buy-bust sa Mambaling Police Station ang laing HVI sa Sitio Alumnos Barangay Basak San Nicolas, siyudad sa Sugbo, pasado alas 12 sa tungang gabii, Huwebes, Hunyo 27, 2024.
Ang suspetsado nga nadakpan giila nga si alyas Michael, 40, taga Sitio Mangga, Barangay Zapatera.
Nakuha sa mga operatiba ang dagkong putos sa gituohang shabu nga motimbang sa 100 gramos nga dunay standard drug price nga P680,000.
Lakip sa nakuha sa kapulisan ang usa ka kalibre 38 nga pistola nga dunay tulo ka bala niini.
Si Michael giingong bodegero sa illegal nga drugas diin nabilanggo na usab kini ug bag-o lang nakagawas sa bilanggoan sa wala pa matino nga kaso.
Ang duha ka mga suspek gikatakda nga pasakaan og kaso bahin sa ilegal nga drugas o kalapasan sa Republic Act 9165. / AYB