Upat ka mga balay ang nasunog, duha niini naugdaw, sa Brgy. Guadalupe, siyudad sa Sugbo, alas 3:25 sa kaadlawon sa Lunes, Abril 15, 2024.
Base sa imbestigasyon ni F03 Fullbert Navarro sa Cebu City Fire Office (CCFO) nga ang sunog niigo sa 148-B M. Velez St. sa naasoy nga barangay.
Gipasaka sa 1st alarm sa alas 3:19 sa kaadlawon, 2nd alarm sa alas 3:28 sa kaadlawon ug 3rd alarm sa alas 3:56 sa kaadlawon.
Gideklarar nga fire under control sa alas 5:38 sa kaadlawon ug hingpit nga napawong sa alas 6:25 sa buntag.
Apan sa upat ka mga balay nga nasunog, duha lang niini ang hingpit nga naugdaw, dugang sa CCFO.
Sumala sa bombero, ang balay diin nagsugod ang kayo gipanag-iya ni Rofino Gawchua apan gipuy-an ni Aniceta Bornales.
Gibana-bana ang danyos nga P12,000,000.
Padayon pa ang imbestigasyon ni F03 Navarro bahin sa hinungdan sa sunog atol ning pagsuwat.
Apan si Eulogio Caballes, molupyo sa dapit nga nahinabi sa Superbalita Cebu, nagkanayon nga alas 3:00 sa kaadlawon nakabantay sila nga miaso ang usa ka bodega sa dapit.
Nakita sab nila atbang sa ilang panimalay ang poste sa kuryente nga ni-spark.
Dali silang nanawag og bombero ingon man nipasirit sa fire extinguisher.
Apan kay mga surplus nga ligid ang naapil sa sunog, paspas kaayo nga nakakatap ang kayo ingon man aso kaayo.
Samtang, usa ka dos andanas nga balay ang naugdaw sa sunog nga niigo sa Barangay Capio-an, usa ka bukirang dapit sa lungsod sa Argao, habagatang Sugbo, pasado alas 9:00 sa gabii sa Dominggo, Abril 14, 2024.
Way laing naapektuhan nga balay.
Atol ning pagsuwat, ang kabumberohan nagpadayon sa pag-imbestigar sa maong sunog lakip sa danyos niini. Ang dapit layo sa sentro sa lungsod. / DVG / GPL