Nikabat og P1.3 milyunes nga balor sa gidiling druga ang nasakmit sa kapulisan sa duha ka mga lungsod sa amihanan sa lalawigan sa Sugbo niadtong Sabado, Abril 20, 2024.
Usa ka high value individual (HVI) drug pusher nga ex-convict, naposasan atol sa buy-bust sa Barangay Pitogo, lungsod sa Consolacion, Sugbo, alas 11:55 sa gabii.
Ang suspek giila nga si Junemar Cutab Corales, ex-convict sa samang kaso, 29, ulitawo apan may kapuyo, ug taga Purok 2, Barangay Lamac, Consolacion.
Matod pa nga sa dihang na-validate sa kapulisan ang maong suspek sa iyang pagpamaligyag shabu, gilusad dayon ang buy-bust.
Kini ubos sa hiniusang pwersa sa mga sakop sa Provincial Intelligence Unit (PIU), Provincial Drug Enforcement Unit (PDEU), Cebu Police Provincial Office (CPPO) ubos sa kamandoan ni P/Col. Percival Zorrila ug Consolacion Municipal Police Station sa koordinasyon sa Philippine Drug Enforcement Agency (PDEA) 7.
Usa ka poseur buyer sa kapulisan nigamit sa P13,000 nga bogus money nga gipaibabwan lang og usa ka P500 nga tinuod nga kuwarta sa pagpalit sa usa ka putos nga shabu.
Dihang gitunol na sa suspek ang druga, gisikop dayon kini ug nakuhaan pa og dugang siyam ka medium size nga pakite sa gituohang shabu ug duha ka dakong pakite nga nitimbang tanan og 100 gramos nga may standard drug price nga P680,000.
CATMON
Laing drug personality sa regional target list sa PDEA 7, ang nasikop sa buy-bust sa Barangay Corazon, lungsod sa Catmon, alas 6:30 sa gabii.
Ang suspetsado giila nga si Erwin Dagatan, 38, way trabaho nga taga Barangay Magay, lungsod sa Compostela, Cebu.
Nakuha sa posisyon ni Dagatan ang mga binulto sa gituohang shabu nga motimbang sa 100 gramos nga dunay estimated average market value nga P680,000, cellphone ug usa ka sports utility vehicle.
Ang PDEA 7 uban sa Regional Intelligence Unit sa Police Regional Office (PRO) 7 inabagan sa Catmon Municipal Police Station nilusad sa maong operasyon nga niresulta sa pagkasikop sa suspek.
Matod ni Leia Alcantara, information officer sa PDEA 7, nga moabot sa unom ka buwan ang ilang pagpaubos sa case buildup sa suspetsado human nila madawat ang kasayuran.
Giingong makabaligya kini og 500 gramos matag semana diin ang iyang area of distribution mao ang Compostela ug mga silingang lungsod sa amihanang bahin sa lalawigan sa Sugbo.
Ang mga suspek mag-atubang og kasong paglapas sa balaud batok sa pagpamaligya ug paghupot sa gidiling druga. / DVG / AYB