Giila sa kapulisan nga high value individual (HVI) ang nasikop sa buy-bust sa Miyerkules sa hapon, Agusto 21, 2024, sa Sityo Gemilina 2, Barangay Tayud, Lungsod sa Liloan, amihanan sa Sugbo.
Ang nasikop giila sa kapulisan sa alyas nga 'Rolex', 44, dunay kapuyo ug taga Purok Pati, Barangay Maslog, dakbayan sa Danao.
Gipalitan ang suspek og usa ka putos nga shabu sa nagpakaaron-ingnon nga buyer nga ahente sa kapulisan bugti sa kantidad nga P16,000 nga bogus money.
Gipusasan dayon si Rolex sa dihang nakompleto ang transaksiyon sa poseur buyer sa kapulisan. Ang subject nakuhaan og kapin sa 200 gramos nga shabu nga gibanabana nga mokantidad ngadto sa kapin sa P1.3 milyunes.
Ang maong malampusong operasyon usa ka hiniusang pwersa gikan sa Cebu Police Provincial Office (CPPO) ug sa Liloan Municipal Police Station inabagan sab sa Philippine Drug Enforcement Agency (PDEA) 7. / DVG