
Gigukod sa mga polis ang usa ka 19-anyos nga tambay kay nisuway og ikyas human gidunggab ang iyahang kanhi schoolmate gamit ang screw driver kaadlawn sa Hulyo 5,2025 sa Barangay Lahug, Dakbayan sa Sugbo.
Ang nadakpan nailhan nga si alyas “Asher,” dunay live-in-partner ug kasamtangang nagpuyo sa nahisgutang barangay.
Samtang ang biktima nga nalandig sa tambalanan mao si “Jun“ 20-anyos, nga residente sa bukirang bahin sa susamang barangay.
BasE sa imbestigasyon sa Mabolo Police Station, ang biktima niadto sa lugar sa nahisgutang lugar kay kuhaon ang gi-order niyang t-shirt nga iyang gi-order sa silingan sa suspek.
Niduol ang suspek ngadto sa biktima, nangayo og P150 apan P15 ra ang nahatag kay mao nalang ang nahabilin sa iyang kwarta.
Tungod niadto, naglagot si Asher hinungdan nga iyang gidunggab og screw driver si Jun ug nakaangkon kini og samad sa luyo nga bahin sa iyang lawas.
Sa pakighinabi ni Asher, hugot kining nanghimakak nga nagayo siya og kuwarta ni Jun.
Gitug-an sa suspek nga grabe ang iyang kalagot sa biktima tungod kay gikulata siya duha ka tuig na ang milabay ug unang higayon nga iya ning nakit-an og balik.
Diritso niya kini og dunggab aron makabawos.
Nasakmit gikan sa dinakpan ang gigamit nga mahait nga butang nga adunay 6 ka pulgada ang gitas-on.
Gitanggong na ang suspek sa Mabolo Police Station ug mag-atubang kini og tukmang kaso. / JDG